Saturday, August 18, 2007

ممكن أشرب شاي ؟


نتخيل سوا إني زرتك في البيت، إيه اللي هيحصل ؟
أنا عن نفسي هبقى قاعد على راحتي وكأني في بيتي وده أكيد شئ يبسطك
بس أعتقد نك هتصر إني أشرب حاجة صح ؟
ولو أنا قلت لأ ؟
هتقعد تقول والله ما ينفع .. انت بخيل ولا ايه ؟ يعني أما اجيلك مش هتشربني حاجة ؟
أه ده كلام سليم

ولو قلت لكوا أنا عايز أشرب شاي .. وفي إيديكوا أنكوا تقدمولي الشاي ده وأنتوا في البيت .. ومن غير ما تدخلوا المطبخ والحوارات دي كلها .. لا خالص .. ده وانتوا قاعدين قدام شاشة الكمبيوتر .. أو حتى في مواصلة .. أو بتتمشوا ع النيل
طبعا مش مفهومة كوباية الشاي السهلة أوي دي
كوباية الشاي دي ببساطة رسالة
والدتي في مسابقة شاعر الشعراء في سوريا دلوقتي .. والمسابقة فيها تصويت
والدتي كانت خدت جائزة أحسن شاعرة عامية في مصر من حوالي 3 سنين

بس دلوقتي نتيجة المسابقة معتمدة على نقطتين
خمسين في المية لجنة تحكيم - وهي طلعت التانية على العشر متسابقين اللي معاها
وخمسين في المية تصويت - وده شئ في إيدينا مع بعض دلوقتي جمهورية مصر العربية كل ما يتعلق بالاستفسارات الخاصة الموجهة للجنة التحكيم والمتسابقين في أحداث الحلقات لهذه الدولة فقط. صوت للشعراء وأعضاء لجنة التحكيم الآن على الأرقام التالية:
Mobinil 9367
Vodafone 9367
Etisalat 9367
عن طريق الارقام السابقه يتم ارسال رسالهsmsبرقم الشاعر المراد التصويت له
الرقم اللي المفروض يتبعت في الرسالة هو 402 هو ده رقمها

أرجو انكوا تصوتوا أول ما تقروا البوست لإن التصويت لغاية يوم الاحد بس
اعتمادي على الله وعليكوا
وميرسي جدا ع الشاي

26 comments:

محمد العدوي said...

انا اتخضيت يا عم


طب مين هيدفع حق التصويت دا ..

مش تقول الرسالة بكام ..

يعني انا هاخد عشرة في المية غير كدة بفتح الله


أو يللا اهو كله علشانك يا مصر ..


حاضر ... سكوت هنصوت

علوة said...

ألف شكر يا معلم
استن خد هنا صحيح
هو انا لو جيت عندك البيت
هتحاسبني ع الشاي؟
وماله يا عم .. ما هي باظت يا عدوي
ميرسي يا معلم

yasmina said...

يا رب امك تكسب يا اخي

تحياتي

Unknown said...

بس كده ياسيدي(:

ده انت تؤمر

Ahmed EIssa said...

مع احترامي يا علوة ومن غير زعل

بس اذاي انا اصوت علي مسابقة انا معرفش شروطها ولا متسابقينها؟؟

ولا اذاي اصوت علي شاعر انا مقرتلوش حاجة؟؟

حتي لو بدافع الوطنية..تفتكر؟؟؟

Anonymous said...

عزيزي علوة
أولا ميرسي جدا ليك على سؤالك
و زيارتك لمدونتي البسيطة أوي
ابقى طمنني على نتيجة المسابقة
و ألف هنا وشفا يا سيدي
منى المحمودي

حــكــايــة said...
This comment has been removed by the author.
علوة said...

ياسمينا
ميرسي و .. عقبالك

إسراء
ألف شكر يا جميل الأمر لله وحده

أحمد عيسى
مع احترامي طبعا ومن غير زعل
هو أنا اعرفك ؟ قصدي يعني عملت إعلان في بلوجك ؟ معلش من غير زعل برضه
الأمر مبني على الثقة بينا كأصحاب
ولو مهتم إنك تقرا كنت سألت عن الموقع وقريت
شرفت سلام

وحدانية
العفو احنا اصحاب
هطمنك من عينيّ حاضر

حكاية
أنا اسف معلش ع الخضة انا عارف
بس انا كنت عايزكوا تعرفوا عندي بدل الموضوع ما يتنشر وسط ناس معرفهاش
وإذا كان ع الحلاوة
من عينيّ الجوز

الجميع
هو انتوا صوتوا ولا ايه الكلام ؟

حــكــايــة said...
This comment has been removed by the author.
حــكــايــة said...

احم
بالنسبة للتعليقين اللى اتلغوا فدول تبعى
اعمل مخدتش بالك بئا
بتحصل

و الحمد لله تم التصويت :)

انا عاوزة الحلاوة عربية بى تى كروزر لو سمحت

mesh2dra said...

السلام عليكم

اتخضيت دي كلمة بسيطة
على اللي حصل


ان شاء الله
ماما تفوز


يارب اكون بعرف
اعمل شاى حلو

سلاماتى

حواء said...

اوك يا علوة بس ابقى قول لنا النتيجة .. كفاية انها مصرية .. تحياتى

علوة said...

حكاية
لا عادي ولا يهمك
دي حلاوة ايه دي ان شاء الله
بس لو اقدر اجيبها لك حلاوة
صدقيني مش هجيبها
في حاجات أولى :))

وحدانية
معلش انا عارف اني وترت الجميع
ميرسي عقبال ما تفوزي برضه في حاجة بتحبيها ونبقى كلنا جنبك

بوسي كات
صباح الفل وبإذن الله تنجح واطمنك
ميرسي جدا ع الروح الجامدة دي

Unknown said...

علم وينفذ

قلب الأسد said...

ربنا يوفقها ان شاء الله يا علي و تكسب ... بس ساعتها احنا بقى عايزين نقولك متشكرين عالجاتوه .. عالكباب .. مش شـاي ! فاهم

علوة said...

أيوية
هو انتي كل ردودك عميقة كده ؟:))
ميرسي جدا يا أيوية

قلب الأسد
فاهم طبعا
وعارف إن الأسد بياكل الكباب ني
:))
بس هي تكسب يا معلم

ابن رشد said...

بجد هنجاول نساعد

علوة said...

ميرسي جدا يا شمس
أنا عارف إني بعتمد على اصحابي

الحلقات بتتعاد طول الفترة المسائية بالمناسبة على نيو تي في من بعد البرنامج الساعة 6 مساءا

mariam said...

ربنا يوفق والدتك
وانا هصوت لها ان شاء الله
لأنها كمان بتحمل اسم مصر

تحياتى ليك

He and She said...

ana Sawwwat Ahoh
Ya Lahhhhwwwwwiiiiii.
Ma2darsh assawwat aktar men keda
good luck

saso said...

هممممممم
النتيجة هتطلع امتي طيب

وياريت تحطلي الموقع اللي الشعر منشور عليه

حــكــايــة said...

هاه يا علوة
طمننا كدا , النتيجة طلعت ولا لسة
خير ان شاء الله

علوة said...

مريام
ألف شكر ميرسي جدا ويا رب

هو وهي
سلامة أحبالكوا الصوتية + ميرسي

ساسو
البوست الجاي فيه قصيديتين

حكاية
التصويت لسة شغال ولسة مش عارف النتيجة امتى

Rosa said...

خير ان شاء الله ربنا معاها
ثواني الشاي على النار اهو
سكوووووووووووت بنصوووووووووووت
:D
لا بجد اكيد كلنا هنصوتلها
و ابقى طمنا
:)

علوة said...

والنبي يا روسا خليه خفيف سكر زيادة
أو فتلة سكر بره وخلاص
أقول لك
ميرسي جدا
:))

mohamed said...

اخد كام واصوت والم لك الحتة كلها