Monday, December 30, 2013

النموذجية

.

نموذج 1
=====

كّلية المجتمعات اللي مش ناوية تتظبط
الفرقة الثانية
دور سبتمبر
امتحان مادة التعامل مع المجتمع
=====


(برجاء كتابة الإجابة الكاملة والاهتمام بعلامات الترقيم لضمان وصول إجابتك بشكل سليم أكثر)

1- السؤال الأول (إجباري لإنك من المجتمع ده وهو ده النظام)

* لو المجتمع بيتميّز بإنّه بيزعل أوي يا عيني من اللي يقول كلام ومينفذّوش، لكنه -نفس المجتمع ده- بيرفض إن حد يقولّه "لا مش هوعد بحاجة لإني مش متأكد!".

قول بقى يا حيليتها:
أ- المجتمع ده تيجي معاه سكّة إزاي؟ وإيه مميزات السكّة المستخدمة؟
ب- إيه أغبى حاجة هيعملها المجتمع ده قريب؟
ج- انت عامل إيه؟
د- عندك ملحوظات؟

===== الإجابة =====

أ- المجتمع ده آجي معاه سكّة بإنّي أتعامل زي السيف الساموراي، يعني حاسم وقاطع مش بلف وآدور ومشغلش بالي بأراء مجتمع مش عارف يظبط حاله أصلا، وبالنسبة للميزات السكّة دي:
1-بتخّلي الناس الواضحة هي الأقرب ليك مش تايهين وسط اللي بيلفّوا ويدوروا.
2- بتعوّد الإنسان يعبّر بحريّة عن نفسه مش يسكت وخلاص وهو فاكر نفسه مضطر يستحمل حاجات برّة عنّه أصلاً، ومن غير جدوى كمان!
3- بتساهم في إنها بتقلل بنسبة كبيرة جداً من نسبة وقوع الإنسان في الكذب اللي مالوش أي لازمة من عيّنة (المجاملات، الكذب بالسكوت، الإحراج..).

ب- أغبى حاجة هيعملها المجتمع ده قريب إنه هيقول نعم.. تاني!

ج- أنا عامل نموذج الإجابة الكاملة لنفسي عشان أوصّل رسايل مش رسالة واحدة لناس كتير معرفهاش يمكن نتعامل مع بعض، لإن اللي بيتعاملوا معايا أعتقد إنهم بالفعل فاهمين إني بتعامل كدة.

د- آه عندي ملحوظات! وكدة المفروض إجابتي وصلت بس برغم إن السؤال مكتوب غلط بس أنا هقول الملحوظات:
1- اللي حاطط الامتحان من المجتمع ده ومالوش الحق يتعامل معايا كدة حتى لو في إيده إنه يحكم عليّ بالنجاح أو الفشل خاصة لما يكون هو فاشل في حاجة فاكر نفسه بيفهم فيها أحسن مني.. بدليل إني أنا اللي بتسإل!

=====

Tuesday, July 16, 2013

إل ورشة الثانية.. ستاندب كوميدي


.
الورشة الأولى والوحيدة لتعليم والتدريب على فن الستاندب كوميدي في مصر تعود مرّة أخرى بعد نجاح الورشة الأولى


إل ورشة مع علي قنديل هتقدّم لك إيه؟

... * القدرة على إنك تكتب لنفسك اللي هتقوله على المسرح.

* إزاي تختار موضوع وتحضر له من الأساس.

* كيفية مواجهة الجمهور أيّاً كان عدده أو تفاعله.

* إزاى تقدر تفكّر نفسك بحاجه كنت ناوى تقولها ع المسرح.

* إزاي تتعامل مع عدم التجاوب من الجمهور.

* إزاي تكوّن أسلوبك الخاص وتعبّر عن أفكارك.

* إمتى تقدر ترتجل.

* ليه وإمتى تتفاعل مع الجمهور.

* مهارة التسويق لشغلك وفنّك.


..
الجديد في إل ورشة التانية:

إل ورشة مع علي قنديل بتهديك:

* ألبوم فيه فوتو سيشن ليك وانت في الحصص.

* فيديو لأول أداء وآخر أداء ليك قبل التخرّج من الورشة.



أما في حالة حصولك على درجة أعلى من 80% من تمرينات الورشة:

الورشة بتضمن لك تنظيم حفلة ستاندب كوميدي من تقديم علي قنديل
لها دعاية على اليوتيوب وعلى الفيس بوك
ويتم تصويرها ولك منتهى الحريّة في التصرّف في نسخة الفيديو من الشو بتاعك



..
إل ورشة هتكون في بيت الرصيف .. مكان لما تعرف حكايته هتحبّه :)
العنوان:
المعادي - 8 شارع 151 من ميدان الحرية - أمام بنك أبو ظبي
للاستفسار عن العنوان تقدر تتصل بـ محمد عيسى : 01006481992



تبدأ الورشة يوم الجمعة الموافق 30 أغسطس (شهر 8 للمحتاسين)
الساعة 5 عصراً - دي هتكون أو حصّة



..
مدة التدريب في الورشة شهر ونص
بواقع 14 حصّة
مدة الحصّة 3 ساعات + استراحة 15 دقيقة ومشروب مُنعش



..
اشتراكات الورشة
اشتراك الفرد الواحد 600 جنيه مصري
مع إمكانية التقسيط في الدفع بحد أدنى 200 جنيه
يعني بحد أقصى 3 أقساط .. (معلش مش هتتخيّل الأسئلة اللي بتيجي)

يتم دفع الاشتراكات وتسجيل الأسماء في بيت الرصيف
https://www.facebook.com/ElRaseef


..
ستتوّفر طلبات الالتحاق بـبيت الرصيف ابتداءً من
يوم الأربعاء الموافق 17 يوليو (أيوة شهر 7)
باب التقديم مفتوح لجميع الأعمار من سن 14 لـ 94 سنة من الجنسين




فكرة إل ورشة باختصار: لو حابب .. هتقدر :)

لو عايز ترمي أي إيفيهات على الكلام ده .. إشطة
بطّلنا اللي يعطّلنا :p
..
لينك الإيفينت على الفيسبوك 
https://www.facebook.com/events/149528251910859

Decision

.



"You can control your past, when you respect the Present.."




Ali Quandil




Monday, May 6, 2013

ليلة ترنحت فيها الروح


 وأخذت أكتب ما لا أعلم ماهيته ولكنه كان رافضاً للنقاش بداخلي .. وخرج

حتى وجدت صديقتي تخبرني بأن الآتي هو ما قلته وأنا ألهث عائداً من تلك الرحلة العنيفة التي ترنحت فيها روحي على حافة الجبل الرخامي الأزرق
.. 




1
صرير المكابح أسمعه بوضوح ..
ورنّة الخلخال ذو الحبّات الماسية ..
وترتيل من الماضي
وضحكة الرضيع مُنتشياً
حتى خطوات النمل أميّزها
هذه متثاقلة تحمل قطعة سكر
وهذه لا
نباح الكلب العجوز وهو يلعب
وفاصل إعلاني
وقـُبلة مسروقة
وطقطقة أصابع قدميكِ
فماذا تسمعين ؟





2-
أكتب فيما لا يزيد عن قـُبلة واحدة .. حُبـَّك





3-
المشاعر .. لا تعرف الأخطاء المطبعية ..




4-
كونِ لي من العشق .. المفردات
حتى تكون حروف اسمك بين شفتاي.. رقصة





5-
عُقد من الأفكار حول عنقي ..
ينفرط
تتدحرج الأفكار مُعلنة ..
إنها كانت في انتظار الفرصة
لتنفرط





6-
ألاطم أمواج الهاجس المشئوم
أنتصر ..
ولكنّي مُبتلّ





7-
أشياءٌ تمرُق .. وأخرى تُراشق
وتترَاشق
وترشُق
وتظل الأشياء المارقة
في مرُوقِها
ها أنا بمارِق






8 –
فاقد الوعي .. لا يُعطيه







9-
وحيداً ..
مثل نجمة في السماء ملّت انتظارِ
عاشق مُستلق يناجيها بما فيه
وحيداً ..
مثل جبل لم يرى من السماء عطفاً وإنما
يخسر من وجوده مع كل قطرة من مطر
ومثل ..
برق يشق العمر والتاريخ بلا إنذارِ
يخترق الرفض .. والبُعد.. والأسرار
وكأنه..
طمي النيل المجذوب بعد كارثة
أو أنه ..
كارثة ستأتي بلا ريب من الوادي
وقد يكون ..
الوادي نفسه بين جنبات الألم
ولكن الأكيد ..
أنه .. وحيد







...
أشكرك صديقتي كارولين كامل


Tuesday, February 12, 2013

ولو انها مش عربية





مَدرسَة ابتدائي قريبة من البيت..

جنب الشباك بيجي صوتهم من بعيد في تحيّة العلم 
صوت جماعي كبير لأطفال صُغيّرين 
مش بسمع اللي بيهتف لكن بسمع رد الجموع 

وهي بتقول :
"تحيّا جمهورية مصر العربية
"تحيّا جمهورية مصر العربية
"تحيّا جمهورية مصر العربية

اكتشفت إني بردد معاهم بهمس كدة

ومع صوت الإكسليفون اللي مش قادر أحدد 
هو بيعزف لحن إيه 
لكن واصلني طعم صباح المريلة 
قلت:

يا رب.. بحق كل الدم اللي سال في شوارع مصر 
وبحق كل شهيد جالك فرحان 
يا رب 
الأطفال دي متحتاجش تضّحي بنفسها 
عشان تحيّا جمهورية مصر العربية


Saturday, February 2, 2013

ف ر ف ت ة



أمام ملايين البشر، وفي عهد محمد مرسي أحد نجوم الإخوان المسلمين، لم تعد الشرطة المصرية "كلاب النظام" إلى طريقتها في عهد مُبارك وإنما تجاوزت كل التوقعات بأن مارست الانتهاك على عينك يا تاجر ولم تكتف بممارسته داخل الأقسام ومباني أمن الدولة اللي لسّة شغال عشان مش طالبة نضحك على نفسنا!

حمادة ..
هو ذلك "الإنسان" الذي تعرّى أمام شاشات العالم أجمع، في الشارع وإن كنت لا أحب أن أذكر موضوع الشارع وكأنه يزيد الطين بلّة، فمجرد تعرية أي مخلوق حتى وإن كان في غرفة مظلمة فهو انتهاك شديد القسوة، ناهيك عن أني ضد أن يقوم المرء بتعرية زوجته غصباً في غرفة النوم! أصلاً!

ولكن..


المُتحدث الرسمي لوزارة الداخلية:
"الداخلية مُعترفة بغلطها وبنعتذر عنه"

الحريّة والعدالة:
"الجانب الإيجابي أن الداخلية اعترفت بخطأها"

حمادة:
"أنا زي الفل والحياة مفيش أجمل منها يا باشا"

مرات حمادة:
"ألو ؟ هاهاهيهيي"

الإخوان1:
"هو أصلاً واخد 3000 جنيه عشان يعمل اللقطة دي"

الإخوان2:
"هو أصلاً عرض رشوة جنسية على العساكر عشان كدة ضربوه"

حمادة:
"المتظاهرين ضربوني بالنار وقلّعوني هدومي"

الإخوان3:
"اه على فكرة العساكر كان بيحموه من المتظاهرين"

بنت حمادة:
"هتستعبطوا؟ م كل حاجة اتشافت ع التليفزيون! بابا "بيكدب" دول هددوه وهو خايف"

ابن عم حمادة:
"هو جبان أصلاً وخايف.. ولما يخرج من المستشفى أهله هيتصرفوا معاه"

حمادة:
"أنا اللي عارف (مصلحة) نفسي"

منى الشاذلي:
"اتصلنا بالرقم الذي اتصلت منه زوجة حمادة، فاكتشفنا أنه رقم أحد ضباط العلاقات العامة بالداخلية"


وأنا بقول:
"الراجل إتقلّع في الشارع قدّام العالم، وكل اللي فات ده معناه إن النظام نجح (يفرفت) الموضوع كالعادة، في داهية حمادة نفسه مش هتفرق بقى اتعرّض لضغط ولا لأ .. أنا مصري وليّ حق في المجتمع وهو إني حتى لو سفاح بغتصب بنات صغيرة -مع الاعتذار للمتأسلمين- لما اتمسك يتّم التعامل معايا بمنتهى الرُقي والاحترام والعدالة الاجتماعية، وبالتالي: يسقط يسقط حكم المرشد!"

الثورة مُستمرة

Thursday, January 24, 2013

ما يستاهلوشي ..؟



 بدون مُقدمات كتير هتكون مُرهقة للي بيكتب واللي بيقرا، أنا بحب البلد دي، زي النهاردة كنت قاعد على نفس الكرسي قدّام نفس الشاشة لكن مش نفس وصلة النت عشان غيّرناها أول امبارح باين!
كنت قاعد بستعد عشان أطلع رحلة تخييم في الصحرا بُكرة، في مكان رائع كدة ع البحر، حاجة كدة شبه نويبع، وكنت ناوي لما أرجع، أستعد عشان أسافر "البرتغال" أشتغل مُدرس عربي للأطفال المصريين هناك، ده هَبَل طبعاً لكن كنت مخنوق من البلد وناسها وحالها وكل الكلام اللي كلنا –باستثناء الشهداء- لسّة بنعاني منّه وبزيادة كمان
كان شاغلني أوي إزاي هقول لأمي، خاصة إننا عايشين أنا وهي لوحدنا، طبعاً كنت عارف إني مهما مشيت في إجراءات ورق وخلافه، وحتى لو وصلت لسلّم الطيّارة، هعيط وأرجع أحضن أمي وأقولها معرفتش أمشي!
قعدت أتصفح النت، قابلت صفحة اسمها "كلنا خالد سعيد"، قريت تعليقات، وتعليقات، وتعليقات ... كتير جداً
اللُغة المرّة دي مختلفة عن مظاهرة ثانوي أيام "الدُرة"، اللي قلوبنا اتدبحت لما شوفناه بيموت في حضن أبوه، وبعد كدة بقى مشهد عادي يكاد يكون بسيط ومُكرر زي إعلانات طارق نور!
في مظاهرات فلسطين، كنت في ثانوية عامّة، ولقيتني بهتف بصوت عالي والمدرسة كلها بتهتف ورايا، وكان في شاب اسمه أحمد م العيال الكبيرة اللي سقطت كذا سنة دول شايلني على كتفه، وكان بيدخّن عادي ومبيقولش إنه تعب ولا حاجة، ساعتها –بغض النظر عن المراهقة- كنت حاسس بوجودي جداً، وحاسس بكتلة ظلم عظيمة جداً على الفلسطنيين .. اللي هم في عقليتي بشر، بغض النظر عن جنسهم أو دينهم أو أعمارهم .. بس أنا كإنسان مش هحب أكون في الظروف دي
الظلم مُر .. والمُر مش حلو .. حاجات منطقية آه .. بس واضح إنها عدّت علينا
والثورة؟ لسّة مبدأتش ..
الثورة مخلوق جميل، حاجة كدة مش ممسوكة زي مشاعر الأنثى، ملوّنة وليها صوت زي العصافير البعيدة في ساعة رزق وصُبحيّة
الثورة ليها كرامة، مش بترضى بأنصاف الحلول، صعب يفهمها انسان بيدفع 2 جنيه في ساندوتش كبدة "ومقتع" إنها فعلاً كبدة!
ولإن الثورة ليها كرامة، اللي عندهم كرامة هم أول ناس اتحركوا، معلش العدد كان قليل بس ماشي، ده اللي بيحصل مثلاً لما حد عنده كرامة أو نخوة يتصدى لواحد مُتحرّش، دايماً بيكون واحد بس لوحده، وللأسف في الغالب بيفضل لوحده إلا لو الضحية حظها كان حلو وفي اتنين أو تلاتة "من ألف" عندهم كرامة برضة ووقفوا معاه
الثورة زي الأميرة بنت الملك، مينفعش تكون غير للشاطر حسن، اللي يقدر يطلع الجبال حافي ويجيب ريشة من النسر، ويصطاد الفهد وبإيده الفاضية يقضي على الضباع، يمكن تشبيه خيالي شوية بس بالمنطق كدة، هو الواقع المُر من كدب ورشوة وأنانية ده .. كان ممكن يجي في خيال حد؟
الثورة أكبر من اللي بيقبل رشوة واللي بيدفعها، أنضف من اللي عامل مؤمن واللي عامل فيها كافر، وأهم بكتير من اللي بيمشي مُخالف واللي بيفكّر في نفسه
الثورة شرارتها "بس" كشفت الكل ..
مجرد شرارة منها كشفت قد ايه احنا كدّابين ومش بناخد موقف، حتى في عز الأيام الحلوة بعد التنحي، أيام الشباب –اللي محكموش دكّة بعد كدة- حصلت كوارث ومحدش اتحرك : كشف عُذرية - تحرش واغتصاب - دبابات داست مينا - رصاصة قتلت الشيخ عماد
ومفيش داعي نقعد نعّد في اللي مات لإنهم اتهروا مزايدة ومش هستغرب لو هم في السما دلوقتي بيبصوا علينا بقرف، ويمكن بيبصوا علينا بمنتهى الحب عشان شايفين المنظر من فوق!
ربنا جميل .. أنا مؤمن بكدة
وعارف إنه بيحبّني، وبيحب اللي بيقرا السطور دي، آه احنا مش فارقين معاه، لكنّه أكيد هيكون مبسوط واحنا عايزين الحياة اللي خلقها عمرانة، ومش كل العمار زرع، في عمار بيتسقي دّم
ودّم العمار .. طاهر
دّم الوطن .. طاهر
أما بخصوص ميستاهلوشي ..
أنا لو شايف إن اللي عايشين معانا على نفس الأرض المصرية دي، عندهم من العلم والقوة والمال إنهم يقدروا ياخدوا موقف شهم في سبيل وطنهم ..
"والله العظيم م كنت عبّرتهم"
دول مش عارفين إن مصلحة الوطن هي مصلحتهم ومصلحة عيالهم
عايشين يعافروا لسن السبعين عشان ملاليم كإننا عايشين في أنبوبة صرف!
البلد مليانة خير .. وهم عارفين ده!
الأجيال اللي فاتتنا أجيال كدّابة .. قالوا :
"كـُل ما يعجبك وإلبس ما يعجب الناس"
وهم عارفين إن الناس عُمرها ما اتفقت على حاجة!
"وجع ساعة ولا كُلّ ساعة"
وسابونا في الميدان
"دبّة بالمرزبة ولا ألف دقـّة بالشاكوش"
ودخلوا برجليهم في متاهات استفتاء وانتخابات ومفيش قانون يحمي الفقير!
هو في سوّاق يشتغل على تاكسي مفيهوش مكنة ؟
في سوّاق يشتغل على تاكسي من غير ما يعرف "الكُمسيون" بتاعه؟

ثورة؟
ثورة إزاي بانتخابتكوا دي يا عُبط؟ اللي فيها عُمر سليمان وأحمد شفيق وعمرو موسى؟ هي كانت ثورة على المقاولين العرب؟
ثورة إيه اللي الإخوان يقولوا خمس ست وعود عن عددهم في البرلمان ودخولهم الرئاسة "ويخلفوا وعودهم".. وتروحوا تنتخبوهم؟
ثورة ايه اللي تخلّي ناس كتير تقول ولا يوم من أيام مبارك؟
ثورة شباب إزاي .. وكل المسئولين دلوقتي عواجيز؟
ثورة إيه اللي تقسّم الناس ؟
ملعون أبو أم الثوار قبل الإخوان اللي منزلوش للناس يتكلموا معاهم باللغة اللي يفهموها!! ثورة إيه اللي من غير جهاز إعلام؟ هي دبابات الجيش أول م نزلت وقفت فين؟ ماسبيرو يا بهوات! ماسبيرو!
إوعى تصدّق إن العواجيز هيحسّوا بحد .. العواجيز لو حسّت بتحس بس بعُمرها اللي ضاع ومش بتعرف تبص لبكرة .. المرّة دي .. لازم تكون للشباب

الثورة مُستمرّة

عاشت مصر دولة كريمة مش بتمد إيدها لحد

إطبع .. صوّر .. وزّع