بسم الله الرحمن الرحيم
يا جماعة أنا دلوقتي وصلت أنا وصديقي أحمد يوسف عند سفارة الجزائر
الدنيا كانت مقلوبة بره وسواق التاكسي واحنا جايين من التحرير قالنا نخبي العلم لإنه لسه جاي من هناك وقالنا هينزّلوكوا من العربية شارع 26 يوليو من أوله مليان ظباط وعساكر أمن مركزي في حالة تأهب قصوى بشكل مبالغ فيه جداً
والشارع مليان مخبرين بشكل فظيع نزلنا بعد مدخل الشارع اللي فيه السفارة لإن المدخل نفسه كان عبارة عن ترسانة كإن في حرب بتحصل في الزمالك
فنزلنا من التاكسي قدام شوية بعد مدخل شارع السفارة بحوالي 500 متر
قبل م ندخل يمين ونلف من بعد المدرسة وصولاً للسفارة لاحظنا حاجة سيئة جداً ..
محل كانت الواجهة الزجاجية بتاعته متدمرة تماماً وشفنا عمال نظافة بيلموا بقايا إزاز مكسور على الرصيف والأسفلت
دخلنا يمين الدنيا مترشقة مخبرين بس محدش كلمنا لغاية م وصلنا عند ناصية كده لقينا صفوف عساكر أمن مركزي برضه ورجال العمليات الخاصة باين حاجة زي كده
في واحد قالنا خبوا العلم عشان هياخدوه منكوا، وإحنا رغبة منا في الوصول للسفارة بالعلم .. فكيت العصاية من العلم وطبقّته وحطيته في جيبي
جيت عند ناصية بعدها- اللي ورا السفارة على طول- لقيت صف تاني من العساكر برضه فدخلت وسطهم أنا وأحمد .. الصول نده عليّ بعد ما عديت بس أنا تمتمت كده وعملت مهم وقلت له بلالم بؤبؤ هنا ودخلت شارع السفارة :
الشارع فيه حوالي 30 عربية أمن مركزي حوالي 1000 عسكري موجودين في الشارع جوه العربيات وحواليها
وحوالي 2000 عسكري في المنطقة على هيئة صفوف وكمية أسلحة خرااااااااااااااافية
اكتشفت وأنا هناك إني أنا وأحمد الاتنين المصريين الوحيدين اللي قدروا يوصلوا للسفارة ولما بصيت للسفارة وشفت علم الجزاير مش عارف أقول ايه ..
يعني حسيت إن عيب وإهانة كبيرة جداً
بعد أهلنا اللي اتعوروا وواجهوا المجرمين في السودان
وبعد الطريقة المفزعة في التعامل مع المصريين اللي في الجزاير
وبعد م إتهانا وكرامتنا اتبعترت على إيديهم
بعد م خططوا لحرب كنا إحنا فاكرينها ماتش كورة
عيب أوي إن العلم بتاعهم يترفع في أي حتة من بلدي
فضلنا رايحين جايين في الشارع وسط العساكر والظباط والمخبرين وكلهم بيبصوا لنا باستغراب كده احنا دخلنا ازاي لغاية م عدينا قدام ظابط لابس جاكيت بني قاعد على كرسي
قالنا انتوا رايحين جايين ليه
فقلت له كنت حاجز جزمة في محل هنا والمحلات كلها شبه بعض قدامها عساكر وأنا مش فاكر المحل
وأحمد قاله وبندوّر على سايبر نت
فقلت له على فكرة احنا مش بتوع عنف
قالي : يعني اللي انت شايفه ده كله وهتعرف تعمل عنف ؟
قلت له : عموما احنا م بتوع عنف .. عن إذنك
اشترينا عصير وكيك من سوبر ماركت فالناس هناك قالولنا انتوا دخلتوا ازاي ؟ قلنا لهم عادي
طلعنا لغاية م وصلنا السايبر اللي احنا فيه دلوقتي على بُعد ناصيتين من السفارة
ودخلت أكتب لكوا الكلام ده عشان تبقوا عارفين:
إن الشارع بتاع سفارة المجرمين
اللي كسروا وعوّروا أهلنا
واللي حرقوا وداسوا على علمنا متأمن تماماً
يعني اللي قاعدين في سفارة الجزاير دلوقتي .. حاسين بمنتهى الأمان في الوقت اللي احنا كنا كل اللي عايزين نعمله نقول مش عايزينهم عندنا طالما هم بيتعاملوا معانا بالشكل المؤسف والهمجي ده يبقى خلاص .. مش عايزين نتعامل معاهم
وكده لو موجة الغضب اللي جوانا .. قِدرنا -نوعاً ما- نقصقصها ونتصرف من خلالها بعقل بالشكل ده
ممكن الأمور تتصاعد ربنا يستر
دلوقتي أنا هطلع على شارع 26 يوليو وأشوف المظاهرة اللي قالوا إنها موجودة
أشوفكوا على خير
.. علي قنديل
.. علي قنديل
من سايبر نت جنب السفارة
الجمعة 20 نوفمبر 2009
2.24 pm
..
عذراً للأخطاء المطبعية مفيش وقت
