Sunday, August 19, 2007

عجبني هذا الشعر .. نادرا ما أقولها

ما أجمل أن تقرأ شعرا لسهير متولي، وما أصعب أن تختار أجمله، نعم أقول هذا الكلام لأنها أمي، ونعم أخرى لأني نادرا ما يعجبني شعرا بمنتهى الصراحة، ولكنها استطاعت أن تحتفظ لكل قصيدة بكيان خاص لا يؤثر أو يتأثر بقصيدة أخرى
وحين أقرأ هذا الشعر وكثيرا فعلت .. هناك شيء ما أرتبط به دون أن أفهمه
شئ أحبه
أحترمه
أصدقه
يبدو لأنها أحبت القارئ وأحترمته
فأصدقته القول
هذا ما حالفني حظي في اختياره
من رصيد سهير متولي الشعري
ــــــــــــــــــــــــــــــــــــــــــــــــــــــــ
أول حدود الذاكرة
إبني الصغير ع السرير
مطبوعه على خده الرسومات مرتين
نام قبل ما انهيله الحكايه بكلمتين
ومتَبْته إيده على عربيه حمرا بنجمتين
مَلِّست على شَعْره الحرير
وسرحت لبعيد البعيد
إمتى تنبَت دقنك الناعمه بزغب
أو يبقى خَطوك ع السكك
مش جَري ورا طوبه
ولا نَط بعَبَط
وازاي هتبقى تستحي من صوتك المِخْشِّن
والشَعر اللي من طاقة قميصك مِنْطِلِق
إزاي يا "علوه" هييجي يوم
وتداوي جرح العشق من غير البُكا
وازاي هيبقى "محمد" الحيران بأسئلته الكتيره
شاب بيقول أجوبه
ازاي هتبقى لاخوك ف لحظه الشرنقه
وازاي هتجمعكم شوارع
تحكوا فيها كل أسرار الصِبا
أخين بتتشَبِّك إيديهم ف الخلا
تتبادلوا قمصانكم سوا
وتحِلّوا طلاسمكم سوا
وهييجي يوم
يمكن أشِب
عشان ما احط بإيدي على كتف اتفرد
يا إيدين طريه صغيره
ليه كل ما انطق إسمكم
تحاصرني لحظة إكتحال عيني بزمان
مش مُنْهَزم
واسمع صهيل الخيل
وجسمي يتنَفَض
واحلم أعيش زمن انتصار
واحد فقط
آه يا علي
كان في زمان صبي
صبـــــــــــــــــــــي
نام ف السرير
واتغطى علشان النبي
يقدر يخطي من حدود داره لأُمَّه
قبل ما تقول الشهاده
صدَّقت
نام والسيوف ع الباب بتصرُخ
بالخيانه
والعَمى
ما ركعش يوم
إلا للواحد أحد
وانا قبل ما احبُّك ع الكتاف طرف الغطا
اتململ الجسم الصغير وانكمش
وعرفت إني مش بقول حدوته
ع الشاطر حسن
أنا بس وسَّعت المسافه
ما بين زمان أعوج وبين
أول
حدود
الذاكره .
ــــــــــــــــــــــــــــــــــــــــــــــــــــــــ
من قصيدة على الورق
-
وعلى الورق ..
رَجَع الحصان للخيمه وشه بينحنَى
والفارس المطعون على السرج انكفَى
رجع الحصان بالدم ناشف ع الرُكَب
ماخلفش وعده بالرجوع
بصهيله بيهش النسور
مشدوده لروايح الدِ ما ولوقت موت
والوعد خيمه اتمرجحت قُدام عيون
نار القبيله اتنتورت
والأرض دارت بالحصان
نَبَحت كلاب
قاموا العيال
بَرَك الحصان
والموت على اتنين اتقسم
والحبر على ورق انسكب
مَرْثيه للعهد اللي كان
لمسه على رقبة حصان
ولموت بيكبر ع الورق .
-
وعلى الورق..
"أسماء"* بتشبه بنت مره انا شفتها
بعيون جريئه عرفتها
بتخبي ف ضفاير صِباها حلمها
والله بنت مهش ولد
طالعه ف ليل الصحرا يحبي قلبها
وستاير الخوف و البروده تهزها
أ شباح بترقص من بعيد
وهي بس لوحدها
وعلى الورق ..
قُلت لها خُفتي؟!
قالت لي قلبي نط قَبْلي
نوّرت كل الدروب
ونّسني ليل شقيته وحدي
إزاي أخاف ..
وانا دمي واخد من أبويا الصدق
مش حبر الكــــــــلام!!


*أسماء: ذات النطاقين، بنت أبي بكرالصديق
-
وعلى الورق..
بسمع "بلال"
بيوضي كل الكون أدان
دعوه وأوان
بيدب بنعاله ف صمت الليل أمان
قادره أحس الخطوه مرعوشه بحنان
بتحن ع الرمل اللي راسم خطوته
طالع يلملم غنوته
للي انتظر الله أكبر
واللي ف قلبه النور يكبّر
دبة النعلين كلام
فيها ســـلام
بتلبي دعوة رب فرحان بالعباد
وقابلته انا
إداني ورقه واختفى
ووقفت طول الليل وإيدي مطَبّقه
خايفه تضيع مني الحروف
خايفه أفَتّح عيني معرفشي أشوف
خايفه يسيل الحبر من عرق الكفوف
نفسي أشوف ..
فَتّحت عيني لقيت على السقف الحروف:
"صبراً جميلاً يا صبيه"
مكتوبه بالنور والدموع
مش ع الورق ..
لأ شفتها بره الورق .
ــــــــــــــــــــــــــــــــــــــــ
ده لمحة من شعر سهير متولي
عجبك ؟
رقم 402 من أي محمول
على رقم 9367
دلوقتي مش عشان اصحاب
دلوقتي عشان ده شعر .. لو عجبك

33 comments:

علوة said...

أنا يا جماعة بكرر أسفي لاهتمامي المفرط بالموضوع ده بس انتوا فاهمين
دي والدتي
ومش عارف أشكركوا إزاي على الجدعنة دي
البرنامج مستمر
وهبلغكوا أول بأول
هي حتى الأن التانية على العشر متسابقين اللي معاها
تفاصيل المسابقة على الموقع ده
www.sha3er.tv

حــكــايــة said...

يا علوة متتأسفش
اى حد بيشوف امه محصلتش مفيش زيها
و بيكون متأكد انها احسن واحدة فى الدنيا و لازم يقول للكل كدا
طب دا انا ماما عملت مربة تين النهاردة انا مصرة انها اجدع من بتاعة فيتراك :p

كفاية تهريج بئا , نرجع للجد تانى
بجد الشعر بتاع مامتك جميل اوى
عارف انت السهل الممتنع , اهو هو دا
و اوعى تفتكر انى باجامل عشان الحلاوة , تؤ تؤ , خالص يعنى :p

لا بجد بجد شعرها عجبنى كتير
و باذن الله ربنا يوفقها و تطلع الأولى و ناخد حلاوتنا :)

علوة said...

ميرسي يا حكاية ربنا يخليكي
أنا مقدّر اهتمامك جدا
وعارف انك أكيد مش بتجاملي
صباح الفل

حــكــايــة said...

صباح النور عليك يا باشا

ها , ايه الأخبار , هه , ايه ايه , هه

علوة said...

أول مرة أتواجد مع حد في نفس الوقت كده
طب لو حبيت أكلمك على الايميل أكلمك إزاي ؟ أصلي لسة مش اللي هو في المدونات
م احنا مش معقول هنقضيها كومينات
ولا ايه ؟ هه ؟ ايه .. هه ؟

حــكــايــة said...

:p

حاضر يا علوة باشا
مش انت بردو حاطط الميل بتاعك هنا فى المدونة
انا هاعلقه و اضيفك عندى ان شاء الله

حــكــايــة said...

بس معلش يعنى فى السؤال
هو الميل بتاع الهوت ميل بتاعك
الاسم لازق فى بعضه ولا فى أندر سكور ولا ايه النظام
ما تكتبه هنا اسهل بردو

علوة said...

ali_quandil@hotmail.com
معلش النت هنج لأول مرة في الثلاثة عقود الماضية
أنا كنت ببعته أصلا
أيام ويتينج
ana montazer
!!

حسن ارابيسك said...

حق عليك وواجب
تعمل مدونه للشعراء الجُمال دول فقط
شُعراء يمتلكون أدواتهم بكل جداره فلماذا تبخل عليهم بمدونه من أجلهم ومن أجل الشعر الجميل ومن أجلنا

wa7dania said...

و أنا بضم صوتي لأرابيسك
ليه مش تعمل مدونة وتنزل فيها شعر والدتك ؟؟؟
هتكون حاجة جميلة أوي
ابقى طمننا على النتيجة
منى

makhlouf said...

الشعر جميل جدا طبعا
مش هاضيف جديد لما اقول كده لكن
باشكر على انه عرفنا على الشاعرة المهمة اللى هية والدته
وفعلا لية مايكونش ليها مدونة تضم اهم اعمالها

قلب الأسد said...

هي الشعر بتاعها جامد فعلا .. بس معقول انت كنت نايم عالسرير و على خدك رسومات و كمان شعرك حرير ! حرير يا علي ! أعتقد ان طنط سهير (نفسها حلوة) قوي عشان تكتب شعر فيك ! هههه

علوة said...

حسن أرابيسك
والله بفكر في الموضوع ده بس مشغول في تقفيل العدد الشهري وسفر أسبوعين كده
بس واضح إن الموضوع عاجبكوا

وحدانية
تقريبا انا قررت أعمل المدونة في أول فرصة
ميرسي جدا وصباح الفل

علوة said...

مخلوف
والله كتـر ألف خيرك يا كابتن
عهد مين ده .. كتّر ألف خيرك

قلب الأسد
مشفتنيش انت يا عم أيام العز اللي امتدت منذ ميلادي وحتى الأمس
وبعدين انت محسسني ان شعري عامل زي الرصيف ليه يا عم .. م هو ناعم اهو
الله يجبر بخاطرك الثلاثاء من كل أسبوع

ايوية said...

علوة
انا مش ناقدة بس بجد الشعر وصل الاحساسى قوى بالذات القصيدة الى بتكلمك فيها حسيت باحساس الام الجميل وهية مستنية ابنها يكبر
ربنا يوفقها ان شاء الله

علوة said...

ميرسي جدا يا أيوية
دي حاجة من الحاجات اللي بحبها في قصائدها
إن أي حد مش مهتم بالشعر أو مش ناقد يقدر يحس فكرة القصيدة
ميرسي جدا وربنا يوفقك

علوة said...

بالمناسبة يا جماعة
الحلقة الجاية
يوم الجمعة 24/9 الساعة 9 مساءا
على قناة نيو تي في
والقصيدة اللي هتقولها في الحلقة جامدة
شوفوها وقولولي

mariam said...

الشعر حلو يا على
ربنا يوفق والدتك
هستناها يوم الجمعه
و انت قولنا الأخبار كل شويه

علوة said...

من عينيّ يا مريم
وميرسي جدا لاهتمامك
أكيد الأخبار أول بأول

princess dodo said...

اتمنى لها التوفيق بجد
حقيقى كلام جميل اوى

وابقى طمنا ياجميل


سلام

علوة said...

من عينيّ الجوز يا دودو
سلام

فى القلب said...

واللهى أنت ليك حق تفتخر بأمك
حاجه جميله تعيش مع حد حساس وشاعر
ويارب ربنا يوفقها
بجد بجد أم عظيمه ربنا يخليها ليك

علوة said...

في القلب
ألف ألف شكر
أنا الحمد لله بفتخر بأمي وأبويا
وربنا يوفقك انتي كمان
ألف شكر

mesh2dra said...

السلام عليكم

عاوزة اقولك حاجة
أنا مبحبش الشعر
ومش حجاملك ومش حقولك حلو
:P
بس انا حسيته

ياااااااارب ماما تفوز

ومانعتذرش على تكرارك للموضوع
ليك حق تعمل اكتر من كده
أنا لو منك كنت
سيحت للموضوع

إن شاء الله
اخبار حلوة عن ماما

بس ابقى اكتب القصيدة اللي
ماما حتقولها يوم الجمعة هنا
معلش
عشان التليفزيون مخاصمنى وانا زعلانة منه

ربنا مع ماما

سلاماتى:)

علوة said...

مش قادرة
ده كلام جميل جدا وأنا احب ده
وعموما جميل انك حسيتيه
وبالنسبة للقصيدة هتنزل قريب جدا بإذن الله
ميرسي جدا ليكي

علوة said...

قلب الاسد
أنا اسف جدا جدا يا منار اتلخبطت في الكومينت اللي فات
معلش بقى اليومين دول انا يادوب بخطف لي بصة ع البلوج عشان الشغل واخد اليوم كله والله الفترة دي
سماح بقى
خلاص بقى
الله ؟

سكينة said...

رائعة يا علوة ساعة حبك لوالدتك ودعمك لها...أحلى بكثير من الساعة اللي قعدت هي تقول فيك شعر بعد ما انت نمت بدل ما تقوم تكمل غسيل المواعين ونشر الكوافيل
:)
يا رب يخليكوا لبعض

علوة said...

ههههههههههههه

ألف ألف شكر .. ايه يا سكينة الكلام الجامد ده

ألف شكر لمرورك

قال مواعين وكوافيل قال
منك لله القصيدة اتشوهت في خيالي
:)) :))

بهلوله said...

ربنا يوفق والدتك
ويكرمك
ومستنيه القصيده بتاعه 24 - 9
والله الموفق

qindeel said...

هو انتوا بتتكلموا عن ايه معلش يعنى !

علوة said...

بهلولة

ميرسي جدا ربنا يوفقك انتي كمان
والقصيدة نازلة البوست الجاي
وألف شكر لمرورك

قنديل

ده موضوع كده بيني وبين حسام حسن


يا جماعة
قنديل أخويا بالمناسبة
!!

mesh2dra said...

فين الجديد بتاعك
!!

علوة said...

عن قريب
المشكلة اني هاتغيب فترة كده عشان مسافر اسبوعين
خللوا بالكوا من البلوج
ابقى افتحوه كل يوم ساعتين الصبح يتشمس
ونفضوا التعليقات كويس
متخلوش البوستات يجي عليها مية
واقفلوا الغاز
متفتحوش لحد
سلام