Saturday, August 11, 2007

العربية فيها مطرب يا حضرات





مفيش داعي تشتري الشريط .. كده كده هتسمعه في
الميكروباص
....
مصطفى كامل يغني من طبقة العناية المركزة
....

مازال مصطفى كامل يعاقبنا على الذنب الذي لا نعرفه، فقد ظهر ألبومه متسربا على النت والذي يحتوي كالعادة على صراخه وسبابه ولعناته التي تشعر أنه يوجهها لك !
عرفنا كامل كاتبا للاغاني، والحق يقال أنه لمع بعدة أغاني ولكن علاقة مصطفى كامل بالطرب مثلها مثل علاقتك بقراصنة الكاريبي، لماذا يغني مصطفى كامل رغم فشل ألبوماته وضعف بيع المسروق منها أبو 2و3 جنيه ؟ لماذا قد يخطئ سائق الميكروباص ويعطي شريطه لأمين الشرطة بدلا من الرخصة ؟
الأسباب قد تتلخص في الأتي : المبدأ الأول هو حشر كلام كتير بحيث السواق – عفوا – أقصد المستمع يحس انه بيسمع كلام مهم ! وتتوالى المبادئ من الاعتماد على الناي لإعطاء إيحاء بالألم والشجن، والتعبير عن ضياع العمر وقسوة الظروف وخيانة الحبيبة التي تعمل في محل تصوير مستندات، وكل مواضيع المراهقين ومحدودي الثقافة.
ولا يستطيع كامل الاستغناء عن حقل ألغام كلماته من صعبة الحياة – خاينة – سنين – ويلة ( مؤنث ويل أصلها طلبت بلاغة )، يا طير – الطريق – على كيفك – الصبر – الجرح وهكذا!
ولأن الله لا يحملنا ما لا طاقة لنا به، جاء في الألبوم 8 أغان فقط – أه والله الحمد لله- ولكنهم كفاءة يعملوا معاك الصح من صداع وغم ونكد، " أجمل سنين العمر" أغنية الهيد التي شارك في تلحينها كامل بنفسه مع شريف حمدان، كالعادة ناي يفتعل الرقة ودرامز يحاول العازف تدميره بقدميه وساعده وكامل يستعرض مهارته في افتعال البكاء. " أديني عايش " نفس الناي والدرامز لسة متكسرش ! وكامل مازال يتألم على سبيل الإحساس في أول الأغنية ويبدأ في إلقاء كلامه الكتير ولن تتذكر كلمة من الأغنية . " إرجع بقى "، المفروض إنها أغنية رومانسية ينادي فيها كامل - بعد أن لحنها - على حبيبه، فسيطر النداء وانتصر على الغناء ! وفي " أنا أسف " يعتذر فيها كامل عن أشياء متخبطة يصرخ فيها تارة ويتنحنح تارة، وفجأة تكتشف ان حبيبته ندمانة على فراقه .. هو مين بيعتذر لمين عن ايه ؟ " مش حتنسى " يتقمص كامل دور الرجل الواثق في نفسه وفي مدى جاذبيته ويقول " أنا مش هتنسي " ويصر على ان حبيبه سيظل يذكره بغض النظر انه – كامل - مازال يبكي في غنائه !
فاصل مع الزقططة ! وأغنية " مع السلامة " يقول فيها " استن تعال هنا خد بس بص بقى واسمعني هقولك ايه " وبعد هذه المقدمة الطويلة يقول لها مع السلامة، كل ده بسرعة عشان واضح انها مستعجلة !
صباح الإحساس في " واقفة ليه" ألحان كامل و محمد جابر، مازل لاعب الدرامز يحاول تدميره دون جدوى، نفس المعادلة: صراخ وتألم وكلام كتير ولحن ضعيف = أغنية لمصطفى كامل .
افسح صدرك كثيرا لأغنية " الله يسهله " التي لحنها كامل الموهوب في التلحين والغناء فهي الفقرة الكوميدية بالألبوم، بدايتها متفهمش بوب ولا جاز ولا شعبي، وتتملك الجرأة من مصطفى كامل فيغني موال .. والله موال! والدف والصاجات ماشيين تمام وفجأة تشعر أنك تسمع أغنية الحنطور والمفروض الأغنية فرايحي بس برضه مصطفى كامل بيعيط !
ألبوم حين تسمعه ستسجد لله شاكرا على نعمة صوتك العذب، لكن لا تفكر جديا في الغناء .. انت شايف !
نشر في الدستور وسبب قلقا بالغا لأحد المطربين .. يا ترى مين .. يا ترى مين؟

21 comments:

حــكــايــة said...

( صراخ وتألم وكلام كتير ولحن ضعيف = (أغنية لمصطفى كامل

اه و الله عندك حق


مش حتنسى " يتقمص كامل دور الرجل )الواثق في نفسه وفي مدى جاذبيته ويقول " أنا مش هتنسي " ويصر على ان حبيبه سيظل يذكره بغض النظر انه – كامل - مازال يبكي في غنائه )

اعتقد انه واثق كدا عشان احنا كشعب بنميل للشجن و الكآبة و قليل لما ننسى لحظات الغم , فأكيد هو كان منكد عليها عيشتها , ازاى بقى تنسى النكد دا

حلو اوى على فكرة :)
بس تفتكر صحيح مين المطرب دا

علوة said...

هو انا من رأييك ولكن بمنظور تاني يا حكاية
هو اننا شعب عاطفي سهل جدا انه يدخل في أي مود عاطفي شجن فرح غضب .. إلخ
وميرسي جدا ..
وبالنسبة للمطرب أنا هموت وأعرفه
:))

Unknown said...

هو الحال ملخبط من كلة لا تمثيل ولا غنا فيننك يا عبد الحليم

علوة said...

وانتي الصادقة يا ايوية
فينك يا دم ؟
في ناس ربنا رحمها لما ماتت زي عبد الحليم
عقبال ما يرحمنا :))

Doaa Ebrahim Aaql said...

بوست قوووى جدا
احييك عليه
هى فعلا ظاهرة غريبه ان برغم فشل البوماته يعمل البوم تانى ويكمل
جايز عنده امل
بس فى حاجه انا ملاحظاها من فتره
مش عارفه انا صح ولا لأ
إن سواقين الميكروباص ذوقهم ارتقى جدااا
ومش هى دى النوعيه اللى بيسمعوها حاليا
يارب الظاهره دى تتطور اوووى
ساعتها بس مش هيبقى فى ولا مصطفى كامل المطرب
ولا المطرب الآخر المجهول ده اللى زعل

تحياتى:)

mesh2dra said...

السلام عليكم


يا نهار ابيض
على النكد

طب سؤال
اشمعنى بتوع الميكروباسات
يعنى هما بيعملوا احلى دماغ
ايه اللي عاجبهم بجد
وشريط كمان واحد بيغني بيقول...على الناس اللي باعونا
على الناس اللي خدعونا
مش فاكرة الباقي والله
بس الاغنية استمرت من مدينة نصر للتحرير

*
*
مغامراتك مع الميكروباس
تحفة بجد
كويس انك ما
ارتكبتش جريمة

سلاماتي:)

To a friend said...

قريت الموضوع في الدستور و لكني لم اكن اعرف انك كاتبه.. مش كنت تقول
:)

الموضوع يجمع بين السخرية المضحكة و الوعي الذكي .. اياكش بس ياخد باله و ياخد اجازة مفتوحة من الغنا و احنا لما نعوزه نبقي نبعت له

العويل و الصراخ و البكاء في اغلب الاغاني عادة بيأتي بنتيجة عكسية.. تلاقي الناس بترقص و مفرفشين اوي و هما بيسمعوا اغاني زي دي .. سبحان الله

اخيرا -و بكل نباهة- اقدر اقول اكيد المطرب اللي زعل ده هو عمرو دياب طبعا

علوة said...

برنسيس دودو
ميرسي جدا ، وبالمناسبة كلامك صح لسببين
الأول : في نسبة من طلبة وخريجي الجامعات بيشتغلوا سواقين حاليا .. وده للأسف حقيقي.
الثاني : بدأ السواق يحس بمدى تدني اللي بيسمعه فبيحاول يسمع اللي بيتباع كتير
ميرسي ع الرد يا تمام

-------------------

مش قادرة
بخصوص اشمعنى سواقين الميكروباص في بوست جاي في الطريق هيقول لك ليه هم اللي بيعملوا كده بالذات.
ميرسي جدا وبالمناسبة مغامرة الميكروباص حقيقية :))

-------------------

فضفضة نور
يا ريت والله من بقك لباب السما قادر يا كريم، رقص الناس على الكلام ده معناه حاجة واحدة بس، الناس مكبوتة لدرجة انها معادتش بتسمع.
بالنسبة لعمرو دياب - للأسف إجابة خاطئة :))

mahmoud said...

انت فقرى
:)

علوة said...

ههههههههههههههههههههه

صباح الفل يا موودي

حواء said...

انا مش عارفة الناس بتحب اغانيه على ايه دى كلها حزن وكآبة انا محبتش غير اغنيه عيد الميلاد او ابوسك حبيبى حاجة كدة ودى شفتها فى الفضائيات فيديو كليب لكن الشرايط مش بشتريها خالص .. تحياتى

علوة said...

يا بوسي كات

شراء ألبوم لمصطفى كامل حرام شرعا
وفي القانون المصري الحديث عنه جنحة

يعني انا دلوقتي هربان:))

Mirage said...

اللــــــــــــــــــــــــــه

مقال جامد جدا والله

انت كل اللى كان نفسى اقوله على مصطفى كامل ده واكتر كمان

انا مش عارف ده ازاى بيغنى والمصيبة ان كل سواقين الميكروباص فعلا بيتكيفوا منه قوى

مش عارف ايه السبب ؟

وتلاقيه مش شغال غير فى الميكروباص وبس حقيقى

منتظر المزيد

بوست ناجح جدا جدا جدا

علوة said...

ميراج
ميرسي جدا على الكومينت الجميل
وعلى فكرة دي أقل حاجة عندي انا بس بحافظ على شعور الزملاء البلوجرز :))
ميرسي جدا جدا

rana 3amra said...

يا نهار اسود ع التريقة اللى بتريقها كل ما اشوف بوستر من بتوعه اللى فارشين بيهم الشوارع

يا نهار اسود انا كدة هاروح النار حدف بس الواحد مبيقدرش يمنع نفسه صراحة
بشوف البوستر و باسيب نفسى اتفرج ع القُصة الخطيرة اللى هو عاملها

انا قريت الموضوع ف الدستور
:))))

علوة said...

الواحد لما بيشوف حد في موقف صعب
بيقول الحمد لله
وده اللي انا انصحك تعمليه بعد م تشوفي البوستر
بس بعد م تتريقي مفيش مشاكل
:))
ميرسي جدا ع التعليق وأتمنى باقي المواضيع تعجبك

Anonymous said...

عايزة أقولك إن مصطفى كامل ده
موجود و بقوة في جميــــــــــع سيارات الأجرة
ميكروباص بقى..تاكسي
هو موجود موجود
وأفتكر مرة كنت في ميكروباص من بلد لبلد..مسافة تكفي ألبوم يعني
الراجل ده قلب عليا المواجع و فكرني بالقديم والجديد كله
والله خلى الدمعة فرت من عيني
!!!!!!!!!!!!!!!!!!!!

علوة said...

هههههههههههه

فعلا يا وحدانية
الدمعة بتفر من عينينا من الألم
مش من الشجن
حسبي الله ونعم الوكيل

S H A H said...

رأيك فيه ونقدك بجد رائع يا علوة

لو مصطفى شاف البوست ده هينتحر


تقبل الفيرست مرور يا نجم

علوة said...

شاه .. واحد من ألذ البلوجرز
نورني الفيرست مرور
بالنسبة انه شافه ,, ف الموضوع اتنشر في الدستور
وفي كلام انه قراه وشاف اني واحد من أعداء النجاح .. آه والله النجاح
وانا والله لا من أعداء النجاح ولا حاجة


انا ســـــواق

gamd_7aded said...

اكرهينى للمره التانيه