لم نحقق فوضى فلسنا نحن من أطلق السجناء
ولسنا نحن من أطلق النار وزجاجات المولوتوف وزجاجات مية النار
كنا نقف باحترامنا بإيدي فارغة اللهم من بضع لافتات
تغيير؟ .. كنا نطالب بتغيير نظام وليس تغيير الأسلوب .. ولم يتغيّر الاثنان بل العكس
قتلونا وأصابونا ودهسونا ونحن معزولي السلاح
لا نريد الرئيس بل نريد الشعب والحرية وضمان الغد
إذا كنت تعتقد أننا نتظاهر بلا هدف .. فتلك مشكلتك
لن نقف عاريين الصدر أمام النار والزجاج والرصاص.. بلا هدف
نحن نريد النهضة .. ويجب عليك أن تساعدنا للنهوض فعلاً
ولا تقل النهضة (مرة أخرى) من فضلك
لإنك كنت ومازلت تعيش في دولة نامية تعاني الفقر والمرض والجهل ونحن نحاول الإصلاح
لذلك قد تشعر ببعض الألم
...
أنا واحد من الشباب اللي هناك
لا جماعات إسلامية ولا أجنبي ولا الكلام ده كله
اتقوا الله وإعقلوا اللي بيحصل لمدة دقيقة واحدة
احنا طالعين عشانا وعشانكوا
عشان إحنا ضد المخدرات اللي بقت في كل حتة
والمدمنين دول ليهم طلعة عليّ أو عليك
عشان إحنا ضد التحرش اللي بقى عيني عينك
والمتحرشين دول ليهم هجمة على أخت أو أم أو زوجة أو بنت
من بيتي أو من بيتك
عشان إحنا ضد الاستغلال والنفوذ والواسطة
عشان ضد تصدير الغاز للأعداء
اللي في أجيال كتير مش مستوعبة إنهم قتلوا فرد في كل أسرة
احنا هناك صامدين عشان في مبدأ
الجرايم اللي حصلت في حقنا 30 سنة
مش هتتصلح في شهرين
أرجوكوا استوعبوا متصدقوش الكلام الفارغ
اعقلوا الكلام
مصر مكانتش في رفاهية واحنا اللي بوّظنا الدنيا
مصر لا بتصنّع عربية ولا بتنظم كاس عالم
احنا بالفعل كنا في فوضى
فوضى أمناء الشرطة والدكاترة المُهملين
فوضى السرطان والعيش اللي عليه فضلات الفيران أو أعضائها
حسبي الله ونعم الوكيل في الكدب
أنا راقد في البيت عندي 6 غرز في دماغي
خبطتين كل واحدة 3 غرز
فضلت أنزف وأنا سادد مع اللي أرجل مني هناك ألف مرة
ولما خيّطتهم كان من غير بنج
وكدمات في ضلوعي وضهري ورجلي ودراعي
عشان كنت واقف في الصفوف الأولى ضد بلطجية
معاهم سكاكين ومولوتوف ومية نار وخيول وجمال
بلطجية شايلين سيوف وسِنج ومطاوي
بلطجية الوسيم فيهم وشه فيه 5 خطوط من بشلة أو موس
كنا بننضرب ونروح نتعالج ونرجع تاني نصدهم
أو نقف نرُد عليهم بطوب من الأرض
والدم بيجري على رقبتنا وصدورنا
آه احنا متعلمين ومثقفين ودكاترة ومهندسين وفنانين
لكن الأهم من كده .. إننا أخواتكوا
مفيش حاجة غالية ببلاش
واحنا معندناش أغلى من مصر اللي بيحاولوا يطفوها
سلام عليكم ويكفيني ربي
لكن أرجوكوا .. بالعقل
إزاي نداوي جرحنا .. من غير إيدينا م تلمسه ؟
أرجوك أنشرها
عـلـي قنديـل
5 comments:
كل كلامك حصل
وانا شاهد عليه
بعد 8 ايام فى التحرير
وكنت جمبك يوم 25 لما الشماريخ ولعت
واحنا اللى رفعناك عشان تهتف الشعب يريد اسقاط النظام
وياريت تقرا النوته بتاعتى دى
وترد عليها
http://www.facebook.com/note.php?note_id=186644668033477
والله انت ارجل واحد في الوسط الفني كله يا علي والله انت خساراه فيهم
انت شرف لمصر كلها
am just proud to have a friend like u . ya rab el nas t2ra we tfham we tsda2 el kalam dah .
am just proud to have a friend like u . ya rab el nas t2ra we tfham we tsda2 el kalam dah .
واللهي يابني عندك حق
حسبي الله ونعم الوكيل في الكدب والنفاق والرشوه والفساد
هنشرها يا علوه
وحمدالله علي السلامه يا وحش
Post a Comment