Saturday, February 16, 2008

I'm comming back


رجعت للبلوج
حسيت زي م اكون ليّ واحد صاحبي قصرت في حقه أوي وراجع له لما احتجته
ارتباطي بالاشياء الغير ملموسة بيريحني جدا
كل إحساس فيه بيبقى ليه طعم مختلف
ودايما بحس إن الأشياء بتحس
كنت دايما لما تشوف حاجة بتتكسر عيني تتعلق بيها وأحس إنها بتتألم ألم فظيع
كل حاجة سواء بلاستيك أو حديد أو خشب أو اي خامة كانت
دايما ليها موقف معايا كنت محتاجها فيه ووقفت جنبي
وساعات كان بيبقى في لحظات مفيش حاجة تنفع غير الحاجة دي
في حاجة عاشت معانا لحظة حلوة .. كاميرا مثلا
في حاجة ساعدتنا في لحظة عتمة .. شمعة مثلا
وحاجات وقفت تتألم معانا .. فنجال قهوة في عزا حد بنحبه
وحاجات اتولدت معانا وخلصت معانا .. إزازة عطر فتحناها
حتى جهاز الكمبيوتر رغم كل تعقيداته
ممكن نطبطب عليه لما يتقل شوية
بدل م نقول له انت جهاز سخيف
البلوج بقى .. حكيت فيه حكايات واتكلمت فيه عن حاجات
ولما رجعت له تاني
عاملني احسن معاملة
الصاحب الكويس هو اللي لازم يكون شبيه بحاجة
يا ريت نرجع تاني كلنا بقوة
عشان خاطر البلوجات بتاعتنا
...
لسه بقول صباح الفل

18 comments:

Unknown said...

صباح الورد ياعلي

حمدالله علي السلامه

اتبسطت اوييييييييي انك رجعت

بس يارب ماتغبش عننا تاني

(((((:

mesh2dra said...

السلام عليكم

حمدا لله على السلامة
نورت فعلا

بس انت كنت سايب صاحبك ليه ( بلوجتك)

على فكرة مش كلام وخلاص
افتكرت بلوجتك من كام يوم وقلت هو مبقاش ييجي ليه

حمدا لله على السلامة

علوة said...

إسراء
صباح الجمال الله يسلمك
ميرسي إنا اتبسطت أكتر
بإذن الله مش هغيب
ميرسي جدا جدا

علوة said...

مش قادرة
وعليكم السلام
ده نورك بجد
فيكي الخير والله ده احنا كلنا عيش وملح وبوستات مع بعض
الله يسلمك
صباح الفل

Noha El-arabi said...

متغبش تاني
بص فوقك
اتنين
تلاته
اربعة
ناس عاوزة تقرالك
ده مش كفاية عشان تحس انك بجد عايش

aya said...

عم على يا جميل
ازيك
وحمدالله على السلامة
ايخه الغيبة ديه يا عم

كده تغيب بقى

يارب كل حاجة تكون بخير يا رب

ومعلش
كلنا بنختفى عن نفسنا ونرجعلها تانى

حمدالله على السلامة

ومستنياك جنب الشباك

Marwa Friday said...

صباااح الفل يا علي
بجد حمدا لله على سلامتك
منور ومنتظرين المواضيع القادمة
وياريت تغير الخلفية الكئيبة دي!ا او براحتك :)

كل سنة وانت طيب

علوة said...

نهى العربي
لسه كلامك رغم بساطته ورقته
قوي
ربنا يكرمك
انا عايش الحمد لله
المهم نتنفس سوا
نورتيني

علوة said...

آيه الأجمل
أكيد مش هغيب تاني
كله تمام الحمد لله
ليكي عندي نسكفايه
جنب الشباك
صباح الفل

علوة said...

مروة جمعة
بلديات شهر ميلادي
صباحك فل وآيس كريم
والله انا عايز أغيّر الخلفية بس المشكلة اني مش بعرف
مستني اللي بيفهم يغيرهالي
صباح الفل
نورتيني

قلب الأسد said...

صحيح الفترة اللي فاتت نسيت المدونات تماما .. عودي يا هاميس قصدي عود يا على و كفاية كسل بقى !

علوة said...

قلب الأسد
هههههههههههههه
انتي لسه عندك مهارة الربط بشكل تحفة
صباحك فل ومفيش كسل

khobayb said...

أهلا بعودتك

والفكرة نفسها لذيذة

بنشعر بيها كتير جدا فعلا

وخاصة الكمبيوتر

:)

Unknown said...

حمد الله على السلامة متغبشى تانى
على فكرة جميلة قوى انغام وهتفضل جميلة بالرغم من وجود جميلات لبنان

علوة said...

خبيب
يا هلا بيك
ربنا يخليك ميرسي
فعلا الكمبيوتر أكتر واحد مظلوم مع إنه الانتيم بتاعنا في كل كلامنا مع بعض
نورت يا معلم

علوة said...

أيوية

الله يسلمك يا ايوية ليكي افتقادة والله
أنغام دي رقة الدنيا فيها
رغم جميلات لبنان
صباحك فل

Anonymous said...

dawly ya 3li we malaksh 7al we dmaghak mo7tarama gedan mesh 3aref 2a2oolak eh

Unknown said...

رجعت للبلوج
حسيت زي م اكون ليّ واحد صاحبي قصرت في حقه أوي وراجع له لما احتجته
ارتباطي بالاشياء الغير ملموسة بيريحني جدا
كل إحساس فيه بيبقى ليه طعم مختلف

الله عليك بجد
جبت المفيد وقولت احساس كل حد فينامبروك الرجوع ولو انها متأخرة قوى
بس المهم انك متتأخرشي تانى بعد مشوفناك

تحياتى/ كركوبة