Saturday, September 22, 2007

البرنس .. ظابط احتياطي


أقف أمام أحد محلات إكسسوارات الموبايلات بمدينة دسوق، أنتظر كريم الريفي صديقي المقرب كثيرا لقلبي والذي يقوم بشراء ما يحتاجه استعداد لافتتاح محله لصيانة هذه الأجهزة التي احتلت آذاننا .. وجيوبنا !
أرى " عمرو "، زميل الدراسة الذي ظل يدرس بالكلية قرابة الثماني سنوات، وقبل أن ألوّح له بيدي لاحظت أنه يمشي برفقة والدته وأخته تقريبا فأتراجع عن قراري
ولكن .. يتركهما وينحرف عن الطريق ويأتي إلى الرصيف الذي وقفت عليه كي يعانقني كما لو كنا لم نرى بعضنا الآخر منذ عقود وكما لو كنا نبيت سويا وفرقتنا الحياة القاسية !
ودار الحوار الآتي :

عمرو : عامل ايه يا عم علي ؟
( مش عم علي بتاع السجاير .. ده يقصدني أنا )
علوة : الحمد ....
عمرو : ايه يا عم انت فين دلوقتي ؟
علوة : الحمد ....
عمرو : ربنا يوفقك يا رب وتحقق اللي بتتمناه
علوة : ميرسي يا ...
عمرو : شفت ايه اللي حصل ؟
علوة : كنت قد تعلمت من كثرة مقاطعته فسكت


عمرو : مش أنا خدت تأجيل من الجيش ؟
علوة : - مضطر أهنيء - ألف .... مفيش فايدة
عمرو : انت مواليد كام يا عم علي صحيح ؟
علوة : أنا نص تاني .. ديسمبر
{ لكل الشباب تحديدا يعلمون أن الغرض من هذا السؤال هو معرفة إذا كنت من مواليد النصف الأول أم الثاني من السنة لما له من حسابات في الجيش }
عمرو : ضاحكا منتشيا فرحا طائرا متراقصا متغنيا
هتلبس يا علووووووة !!
{ لاحظ توقيت النداء باسمي المفضل }
علوة : ناظرا بغيظ واضح
احم .. مين اللي قال لك كده ؟
عمرو : هما قالولنا كده هناك .. اللي متأخر أكتر من دفعة وواخد الشهادة سبتمبر
هيلبس من غير كلام .. يعني انت هتلبس يا حج وهتلبس ظابط احتياطي 3 سنين
علوة : أمك اللي هناك دي يا عمرو ؟
عمرو : آه
علوة : طب روح دلوقتي عشان متسيبهاش في الشارع كده عيب
عمرو : طب انا عايز أشوفك يا عم
علوة : يا باشا عدي عليّ في أي وقت .. :) انا الحمد لله خدت المحل ده
عمرو : كويس والله .. طب وهتعمل فيه ايه لما تروح الجيش ؟
علوة : غور ياله من قدامي

وتركته ورحلت قبل أن أستل مسدسي الـ 9 مل وأفرغ خزنته في صدره، وبغض النظر عن غضبه من انقلابي المفاجئ هناك سؤال الآن

البرنس .. ظابط احتياطي ؟

لن نلتفت إلى حياتي من انطلاق في الطرقات والمدن، فإذا قارنت بين حياتي وحياة الجنود سأشعر بحلاوة الأولي دون ما فيها من سخافات، وسأشعر بمرارة الثانية دون ما بها من مكاسب، فأولى مهماتي كجندي أو كظابط كما قال رحمه الله عمرو .. هي استكشاف الجميل في الجيش .. وقد قال أصدقائي الذين سبقوني وانا لاحق بهم كثيرا.. إني أنفع أوي في الجيش .. المهم معملش واعي ولا أعمل عبيط
وللحق أقول .. المخيف والمرعب في الجيش بحق .. هو أن أتسلم الخدمة في وحدة أو كتيبة .. قائدها يحب مصطفى كامل !

اللهم إني قبلت بحكمك .. وأؤمن بأنك تدخر لي خيرا وفيرا وفيرا
ودعائي كل الدعاء .. بلاش أشوف عمرو .. أو ألاقي الجيش غيّر رأييه وجابوه عسكري في الكتيبة بتاعتي

انتباه .. صباح الفل والله أقول لهم كده في الطابور بتاع الساعة 5 الصبح ده


45 comments:

غمض عينيك said...

لا ياباشا ماتقلقش
هتشوفه فيديو
بس


عادي عادي
لازم تكون وطنى وعندك استعداد تخدم بلدك اللي ربتك ودلعتك وهننتك و...بقولك ايه
مبروك مقدما يا علوة
ربنا معاك

محمد سمير

علوة said...

محمد سمير
كل اللي يجيبه ربنا كويس
ولد
بنت
ظابط احتياطي

يا باشا انا نفسي أدخل الجيش
:)

فى القلب said...

عارف يا علوه
أنا بدايق من الناس الخنيقه الى مش عندها ذوق
لو كنت وقفه معاك كنت غذيتوه ليك بسن أله حاده
طبعاً مش بيخنق علوتنا

عموماً بنظره أجابيه أنا بشوف الجيش ليه حسنات و مش كله سلبى
و ربنا يوفقك بمشروعك الجديد و يكون فاتحه خير عليك

قلب الأسد said...

ههههههه إشطاط يا دفعة ... يا سلام بفرح في الولاد قوي لما يروحوا الجيش ! بيتربّوا ! .. لأ ماتقولش صباح الفل قول مخاااالي شل .. أو موبل مش فارقة .. مساء الورد

محمد العدوي said...

ههههههههههههه

ايه يا عم الفأل الحسن دا ..


بس فلعا في ناس ربنا بيبعتهم يشوفوا الحاجة الحلوة في المكان .. عينهم راكبة بالمقلوب يعني ..



متحول مكتب يا عسكري
بتسيح على الملأا ..

محمد العدوي said...

وحدة أو كتيبة .. قائدها يحب مصطفى كامل !



أوعى تميله ..

ميلا حبتين بس .. مش أكتر


:D

علوة said...

أوشا صباح الفل
سن ألة حادة
منقلة مثلا ؟
ميرسي على نورك يا أوشا متبقيش تغيبي

صباح الفل

علوة said...

قلب الأسد

منار .. بقول لك ايه .. الله يكرمك بلاش افترا
بتفرحي في الولاد ؟ يتربوا ؟ الله يجبر بخاطرك يا مفترية
ورد ايه بقى م خلاص
:))
صباح الفل

علوة said...

ابو عدوي

ربنا يستر عليك انت هتقدم معايا صحيح
بس انا هطلع تمام ومش هعمل معاك زي م عمرو عمل معايا
ربنا يوفقك يا رب وتاخد اعفاء او تأجيل ولو حصل ولبست تيجي في دفعتي عشان أظبّطك أجازات

انتباه يا حبيبي
انتباه يا خويا

صباح الفل

علوة said...

محمد العدوي تاني

طب عشان خاطر الكومينت ده بقى يا عدوي لو شفتك في الدفعة بتاعتي هديهم كلهم أجازات وأديك انت 3 ألبومات لمصطفى كامل تقعد تسمعهم في الصحرا بالليل

انتباه الفل

البِـئرُ والظمّأْ said...

سلام الله عليك

ايه ده
خلاص يعني هتروح الجيش
و ظابط احتياطي
هههههه
كان الله في العون
:(((
.
زيزي

bastokka طهقانة said...

طيب ما تاخد طهقان معاك و تريحني؟
بس خليهم ياخدوة لوا علشان يقعد خمس سنين
اوروفوار

Mirage said...

ايوة كده رجعنا لبوستاتك الجامدة
:)

بس متخافش

ان شاء الله هيبقى آخرك عسكرى

بس هو ماله كان فرحان فيك قوى كده ليه ؟

علوة said...

زيزي

وعليكي سلام الله

كلامك كان مدي على البقاء لله في الأول

مش عارف بعد كده بقى كارف على سخرية ليه ؟

حسبي الله ونعم الوكيل
واء .. واء .. واء
ربُنا يجدم للي فيه الخير يا بنتي
صباح الواء
:)

علوة said...

طقانة

أخد طهقان فين يا حجة انا رايح دريم بارك ؟

والله ؟ يعني أروح أقول لهم ماما بتسلم عليكوا وبتقول لكوا خدوا طهقان 5 سنين عشان عندنا ضيوف

صباح الفل يا طهقانة نورتي

علوة said...

ميراج

يا باشا هو في أجمد من بوست منير عندك
طب ما ندعي آخد إعفاء أظرف يا معلمي ؟
سؤالك ده فلسفي عميق
محدش فينا يقدر يرتقي لفكره عشان نعرف هو فرحان ليه

عايزين نروح حفلة منير سوا

انا نازل الشغل حالا وهعلق عندك ونتعامل أول ما أرجع

صباح الفل

mesh2dra said...

السلام عليكم

كتبت كومنت وكنت حببلش بس تراجعت
ومسحت كل اللي كتبته

ما علينا

ربنا يوفقك
ويكتبلك الخير


سلاماتي

Marwa Friday said...

صباح الفل ..يا علي
خلي السلاح صاحي ..صاحي ..! أنا شايفه يا علي إنك ماتسمعش كلام منار الخنيق ..بمعنى ..اننا كبنات عندنا جيش برضه !..وان الجيش مش نقمة قوي بالعكس دنيا جديدة تتعرف فيها على خبرات وكمان تصقل قوة الإحتمال عند البني آدم ..أنا بحس ان الجيش حاجة هايلة والله رغم كل اللي بيتقال ..أجمل حاجة التفاؤل اللي لمحته بين السطور ..إلى الأمام يا علوة ..ربنا يجعل لك في كل خطوة سلام ..سلام !ا

علوة said...

مش قادرة

طب ومسحتيه ليه ؟

برضه سلاماتي

صباح الفل

علوة said...

مروة جمعة

الحمد لله التفاؤل موجود يا مروة وكمان معنديش أي مشكلة وكل اللي يجيبه ربنا كويس وانا مستعد له

كلامك نوّر يا ستي
ربنا يوفقك

صباح الفل

كراكيب نـهـى مـحمود said...

المدونة شبهك طيبة وجدعة ودمها خفيف
بس الفرق انها مش هتلبس ولا هتقعد 3 سنين في الجيش
صباحو فل يا عسكري

علوة said...

الله يخليكي يانهى
هي تيجي ايه في مدونتك بس ؟

بالمناسبة احنا بنحاول ندعي اني مدخلش بلاش تسلمي بالأمر كده انا الدمعة هتفر من عيني
:)))
نهاره ابيض يا افندم

Unknown said...

ولا يهمك يا دفعه و كلنا فدا الوطن و انت معروف عنك الشجاعه يا وحش

خيرالدين said...

بما ان اسمك بيقول على رد قلبى
واخوك قنديل ينفع صلاح ذو الفقار
فالضباط الاحرار هيزعلوا قوى لو انت اخدت تأجيل

تخيل بقى لو احمد كامل-اخو القيثاره مصطفى كامل-كان جيشه معاك

وعرف ان انت اللى كنت مبهدل اخوه فى الدستور ومضحك عليه كام مليون مصرى

لا يا عم
هندعى لك ان شاء الله تأخد تأجيل

علوة said...

يا سيدي طب يا ريت

ع الاقل انا هبقى ظابط

ولما عسكري يغلط هخلي المعلم ده يغنيله
ولو المعلم غلط
هخليه يسمع اخوه طول النهار في الشمس

نورتني يا جميل
صباح الفل

خيرالدين said...

شكرا يا على ردك اللى اسعدنى
وياريت تسمح لى اضيف مدونتك الجميله

Unknown said...
This comment has been removed by a blog administrator.
علوة said...

احنا

يا سيدي الفاضل ده شرف ليّ

ميرسي جدا

صباح الفل

علوة said...

محمد صبحي

أرجو التركيز في الإملاء وفي اختيار الألفاظ

Unknown said...

علوة


الجيش بجد ومش كلام انشائى شرف الى مصرى انة يخدم وطنة فية انا مش فاهمة انتم لية بتفرحوا قوى لما تاخدوا اعفاء

mesh2dra said...

تعالى خد التاج بتاعك
تاج جديد:P
بس تجاوبه صح:P :P :P

علوة said...

أيوية

لا والله الفكرة ان انا قضيت وقت احم طويل شوية في الكلية سنتين تحديدا وانا بس معترض على فكرة ظابط احتياطي لانها 3 سنين
المشكلة مشكلة العطلة بس والله
ده انا حتى اصحابي اللي دخلوا ظباط كانوا بيقولولي انت هتعرف تتصرف في الجيش

صباح الفل يا أيوية انا مش تامر حسني
:))

علوة said...

مش قادرة

انا ضهري وجعني من كتر التيجان دي

يا مسهل

ألف شكر يا مش قادرة

صباح الفل

البرديــــــة المصرية said...

قوم يا مصرى
مصرى دايما بتناديك

ما تخافش
بتعدى يا مان
المهم ما ترجعش حافظ أغانى مصطفى كامل كلها أو حتى بعضها

صباحه فل يا دفعة

iHaB said...

سكت الهَوى والناموس طار
والسبع طاطا بعينه

خليه دا النومِ أستار
لما الكلب ياخد يومينه
ابن عروس ..
ايه يا برنس ..كل عامون وانتم بخير :D

Unknown said...

ههههههههه

ان شاء الله تاخد اعفي(:


كل سنة وانت طيب

ويارب يكون عيد سعيد عليك

قليل من التفكير said...


لا ياعم ان شاء الله ميجيلكش حوار ضابط الاحتياط ده الا لو أنت عايزه

بس مين اللي هيفتح محل
كريم صحبك اللي اتكلمت عليه في الاول ولا انت

Mirage said...

يابنى انت بتغيب ليه كده بس ؟؟

بتروح فين نفسى اعرف

علوة said...

البردية

وكان فضل الله عليك عظيما

وبعدين بعد ده كله دفعة ؟
ظااااااابط

يا احلى فل في الصباح

---------------------

ايهاب

وانت من اهل الخير يا ايهاب

---------------------

اسراء
يا هلا يا اسراء معلش انا مقصّر بس غصب عني والله
كان عيد حلو .. كل سنة وانتي فل

---------------------

قليل من التفكير

انا عن نفسي عايز افتح محل تصوير مستندات في الجيش

المحل بتاع كريم صاحبي فتحه الحمد لله خلاص
نورت البلوج يا زعيم

---------------------

ميراج

والله والله فيك الخير يا زعيم
انت الوحيد اللي سأل

صباحك فل

aya said...

علوة
اسفة انى اتاخرت اوى فى الرد على البوست ده
وعلى زيارة المدونة
بس اعذرنى
الدنيا ملعبكة والدراسة رخمة و
والحياة شادة حيلها عليا على الاخر
المهم
الجيش للرجالة
ضابط احتياطى
بقى ولا مش احتياطى
ولا عسكرى سنة واحدة
ان شاء الله ربنا هيجيبلك الخير
قلبى معاك
والله معاك يا دفعة

علوة said...

Aya

يا هلا بوصولك يا اية المهم انك وصلتي ويارب تنوّري على طول المهم شدي حيلك كله هيعدي ومش كله هنفتكره
!!
للأسف في ناس كتير فهمت تفكيري في الجيش بشكل مختلف
الموضوع ببساطة ان فكرة التوقيت والمدة الزمنية هي المشكلة لإني بعيد عنك طوّلت شوية في الكلية وموضوع الجيش كان بس هيعطل شوية مشاريع كنت بدأت فيها بالفعل

بس دعوتك حلوة ربنا يخليكي
ويا رب نشوفك على طول

صباح الفل

Anonymous said...

انت تجيب ذنب الجيش ده على اخوك
اقعد امسكه وقوله انت السبب انت السبب
اما انا بقى فموضوع تانى
مش المفروض ان الشباب بيروحو الجيش والبناويت الحلوة اللى زيى انا كدة بيروحو الخدمه العامة
طيب الولد الوحيد مش بيروح الجيش
طب مانا البنت الوحيد عاوزنى يخلونى اخد خدمه عامة بعد الكلية ليييييييييييه؟
تفرقة عنصرية
بقلك اية
انت تيجى تزورنى ومتخشش عليا ايدك فاضية تجيب معاك تعليقين 2كيلو موز او لب ونقعد نأزاز
بس اوعى ترمى حاجة على الارض فى البلوج احسن ازعل منك

gamd_7aded said...

متقلقش هنشوفلك كتيبه فى الحصفه تتغدى فى البيت وترجع على طول

gamd_7aded said...

ابقى خد معاك حلاوه علف او كفوف عشان العيال بتوع الحصفه بيحبوا النشاط ده

gamd_7aded said...

اه نسيت اقولك ان انا عماد السماحى