Sunday, September 16, 2007

نقول صباح الفل ؟

ده تاج جاي هدية من
مش قادرة
من فترة طويلة بس لظروف السفر لم اتعامل معاه
انا بصراحة احيانا بزهق من قراية التاج
ياريت التاجي بتاعي ميبقاش كده
اسمك

سرحان عبد البصير .. علي قنديل

اسمك المشهور بيه وسط اصحابك

علوة .. واصحابي من زمان بيقولولي علي بوند

اسم مدونتك

جنب الشباك

لماذا اخترته ..وماهي نيتك من وراء اختياره

اخترته لاني ده مكاني المفضل في أي عربية أركبها، والنية من اختياره هو ان اللي بيقعد جنب الشباك بيبقى شايف الدنيا بره من غير ما ينعزل عن اللي حواليه

صورتك في المدونة ورمزيتها

صورتي وانا قاعد جنب الشباك .. وقال ايه عامل نفسي بفكر يعني
لا انا كنت سرحان بجد


لماذا دخلت عالم التدوين من الاساس

هو موضوع التدوين ده جه بالصدفة على فكرة، لقيت أخويا قنديل وبقية اصحابنا كمان عاملين مدونات
وفي نفس الوقت أنا بحب الاحتكاك على النت المرتبط بفكر وفضفضة وتعبير مش على طريقة هاي ممكن نتعرف
وبعدين كنت بلاحظ ان المدونين – اللي بجد – عندهم أراء كويسة وبيعبروا عن مواضيع جميلة
وانا بصراحة عندي مشكلة في تكوين صداقات هنا في القاهرة لإني اصحابي قليلين اوي هنا
بس الحمد لله قابلت اصدقاء فعلا في منتهى الجدعنة من خلال عالم التدوين

هل فكرت في إغلاق مدونتك؟ والسبب؟

بصراحة لاء مفكرتش في الموضوع ده ، السبب إني مستمتع بالمدونة بتاعتي بالعكس ده انا كمان مستعد للدفاع عنها ضد أي مغتصب
يخرج من يسار المسرح

احلى بوست كتبته ...ضع اللينك , ثم اذكر لماذا
مش عارف .. أصل أنا مش بعبي ألبوم يعني .. كل بوست ليه سبب انا مش بكتب كده وخلاص .. بس انا كنت حابب
موضوع أن تكون علي قنديل، أو بمعنى أصح كنت متأثر وأنا بكتبه
وفي نفس الوقت بدأت أحس ان موضوع مصطفى كامل حلو بجد

أفضل بوست قرأته؟ وضع لينكه

كتير .. وبصراحة أكتر انا مش برد غير على البوست الكويس
لكن أكتر بوست في بالي أوي دلوقتي وهو فعلا بوست رائع للمدونة المفكرة أيوية
وموضوع عن المثليين للمدونة الجامدة اوي حكاية

وأكتر حاجة لفتت انتباهي فيه هو الشياكة في التعامل مع موضوع مهم

أفضل مدونة قرأتها

المدونة اللي بعلق فيها

لو حد قل أدبه فى التعليق إيه رد فعلك

بنشر التعليق بتاعه وبعدين أنشر صاحبه بالأدب

أسوأ مدونة؟

مدونة الكذاب والمفتعل والفاضي .. والمثلي

أسوأ بوست / أسوأ مدون

بوست مفيهوش حاجة .. رغي الفاضي

اديت الباسوورد لحد قبل كده

آه .. مخلوف .. الرسام معايا في الدستور – غني عن التعريف طبعا

كانت إيه طبيعة علاقتك بيه؟

كنا شغالين على تاكسي سوا وكنت خابط فيسبا واحتمال اتحبس
!! بهرج طبعا
صديقي ومن الناس اللي بحبهم فعلا

هيحصل ايه لإيميلك لما تموت

هيزعل

شخصيتك نوعها إيه

غنية الحمد لله – متقلبة الحمد لله – مغامرة الحمد لله – كويسة الحمد لله
طموحة الحمد لله - واقعية ورومانسية الحمد لله

السفر بالنسبة لك؟

أحلى حاجة .. حاجة كده زي الفراولة

وقت فراغك بتعمل فيه إيه؟

كان زمان السباحة – الجيم – سينما – مسرح – التسكع في الشارع
دلوقتي النت فقط .. والتسكع في الشارع

المود بتاعك؟

فل

الاكلة المفضلة؟

الحمد لله بحب كل نعم ربنا – بس بعز الكوارع وحلويات اللحمة أوي

الصفات اللي أخدتها من بابا و ماما

من بابا : الجدعنة – الإيمان بالثقافة – الأدب في التعامل – الطيبة - السهر
من ماما : الجدعنة – الإصرار على النجاح – التسامح – اهدار الحق أحيانا

اكتر ست حاجات بكرهها



الكلاكسات الكتير بدون داعي
السواق قليل الأدب
حد يحكم عليّ من غير ما يعرفني
الظلم
الممثل المشهور اللي مش بيعرف حتى يتكلم – كذلك المطرب
البرص

اكتر ست حاجات بحبها

علم مصر
العربيات
الخيول
البحر
طائر الحمام والسطح
الصاحب والصاحبة الجدعان

الشغل بالنسبة لك؟

حسنة قليلة تمنع بلاوي كتيرة - الشغل رجولة

الانترنت بالنسبه لك؟

احتلال

امرره لمين ؟

مخلوف قال مش عايز .. وهشام رحمة قال ماشي قشطة بس المشكلة اني مخنوق من هشام عشان مواعيده الفالصو
يبقى نمرر لحكاية وأيوية ووحدانية
في كمان تاج
هو ينفع أعمل تاجين ورا بعض كده ؟
لالالا بلاش .. تاجين في البلوج حرام برضك بالكاف
صباح الفل

43 comments:

البِـئرُ والظمّأْ said...

ههههههههههه
السلام عليك يا علوه
جميلة قوي اجاباتك

انا كمان بحب اقعد جنب الشباك على فكره
تحياتي ليك يا علوة
و صباح الفل عليك انت كمان
سلام
.
زيزي

البِـئرُ والظمّأْ said...

ايه ده ثواني انا نسيت حاجه
انا اول المعلقين
يعني بريمو يا باشا
ههههههه
تحياتي
سلام

علوة said...

صباح الفل يا زيزي

القعدة جنب الشباك دي للعظماء على فكرة
طلعي كارنيه النقابة بقى

سلام

علوة said...

ايه ده ثواني انا نسيت حاجة
انتي أول المعلقين
يعني بريمو يا جميل
ههههههه

نوّرتي البوست يا زيزي

صباح الفل

فى القلب said...

هههههههههه
كمان دمك زى العسل مش رومانسى بس


حلوه حته هشام رحمه قال ماشى قشطه بس مش هدهوله عشان مخنوق منه
هههههههههههههه
فعلاً فكرتنى بسرحان عبد البصير فى مشهد المحكمه لما كان بيكلم الحاجب ومعاه زجاجه الكولا


أجاباتك جميله جدا يا علوه

Marwa Friday said...

صباح الفل يا علي
أنا بقرأ لك في الدستور ..في صفحة الفن هايل بجد وكتابتك دمها خفيف - طبعا مش برج القوس بقى!- اجاباتك حلوة والتدوينة الماضية كانت جميلة فعلا يا علوة ..ربنا يوفقك ..سلامي لك ولمحمد قنديل "تلات سلامات"أنا عارفه انه بيتغاظ من كده! ا

علوة said...

في القلب

والله انتي بتحرجيني بذوقك وكلامك العالي ده
بس أرجع أقول لك
دي أقل حاجة عندي
:))

بتنوّريني دايما
صباح الفل

علوة said...

مروة جمعة

ميرسي جدا جدا يا مروة أتمنى أن كتابتي تبقى أفضل ألف شكر لكلامك الحلو
أحلى صباح لأشيك برج في الأبراج كلها
شرفتيني يا مروة

وأي حاجة تغيظ قنديل أخويا عرفيني على طول
:))
صباح الفل

Ehab said...

احلى حاجه في التاجات دي انك تخش على المدون من دول تلاقيه مطلع مصارين افكاره بره دماغه وقاعد يفرجنا بكل صراحه وانا بموووت في الصراحه
تحياتي على التاج الجامد ده
وبعدين هو انت بتكتب في الدستور قشطه قوي
عقبالي لما اكتب حتى في الجريدة المنور
ماعلينا اتشرفت بيك
_______________________
نبأ هاااااام
هبه اختي هتنشر اول كتاب ليها في الأسواق يا ناس
والمفاجأه ان الكتاب هو السلسله اللي كانت بتنشرها في مجلة بص وطل
يوميات اتنين مخطوبين "عمر و ساره"
الموقع بتاع بص وطل نشر الخبر وحاطين الصوره وهي بتمضي العقد
استعدوا عشان تشتروا الكتاب
اهم حاجه ان الكتاب فيه بس اللي هي كتبته مش اللي الناس كتبوه
لأن الفكره ناس حاولت تستغلها وتكتب فيها اللي على مزاجهم

صدقوني هتعجبكم قوي
وممكن تقرأو ا الأجزاء الأولى من ارشيف مجلة بص وطل
والحاضر يعلم الغايب والغايب يسأل الحاضر
سلاااااااااااااااااااااااااام

علوة said...

الله يخليك يا أيها الشنكوتي الكبير
ده انا اللي اتشرفت بيك يا معلم
وربنا يوفق هبة أختك ولازم تلاغينا يا عمنا أول م الكتاب ينزل عشان نشتريه طبعا
سلامي لهبة وقول لها مبروك وعقبال الكتاب الألف
وقول لها صباح الفل

كلبوزة لكن سمباتيك said...

صباح النور
يا طولة بالك
بس عجبني رد ان الايميل حيزعل
هههههه
رمضان كريم

MAKSOFA said...

مدونه شقيه وجميله
وأعجبتني طريقتك في الردود ، ورحم الله عمك علي وأطال الله في عمرك ومتعك بالصحه والعافيه

كل سنه وأنت طيب

علوة said...

sampateek

م هو هيزعل بجد
:))
رمضان جميل
كل سنة وانتي حلوة

صباح الفل شرفتيني

علوة said...

مكسوفة

الله يخليكي العفو مدونتك أجمل
ميرسي جدا

وانتي طيبة وتمام

نوّرتي البلوج

صباح الفل

Unknown said...

انا كمان بحب الشباك اوي بس بتاع العربيه علشان لو شقه او اي حاجه عاليه بخاف
حلو اوي التاج و اهم حاجه اني مزهقتش و انا بقراه

Unknown said...

اجبات جميلة
شكرا للتاج

علوة said...

صباح الفل يا ايمي

جميل جدا انك بتحبي جنب الشباك
وجميل جدا انك مزهقتيش
والأجمل لو بطلتي تخافي من المرتفعات

صباح الفل

ــــــــــــــــــ

أيوية
العفو يا ستي ده أجل واجب
ديهدي ؟

صباح الفل

غمض عينيك said...

صباح الفل والجمال ع التيجان الجامدة والاجابات الاجمد

انا كمان بحب قعد جنب الشباك...بي عشان انعزل عن اللي حواليا وخصوصا لما اكون راكب ميكروباص

تحياتي ليك
يافندم
محمد سمير

mesh2dra said...

ولد
!!
حعيط والله
هو انا" مش قادرة" اللي انت بتتكلم عنها

انا اديتك تاجين مش تاج
وكمان
الاسئلة اللي مجاوب عليها
مش في التاج بتاعي

اسمع
تجاوب على التاجين اللي بعتهم
و
إلا

حعيط

http://mesh2dra.blogspot.com/2007/08/blog-post_31.html

عااااااااااااااااا

________

تصدق انا كمان بحب اقعد حمب الشباك
وبتخانق
احم احم
ايوة بتخانق ..فيها حاجة دي
مع اختى الصغيرة واخويا الكبير:D
على القعدة جمب الشباك
عادي يعنى ..بتحصل في احسن العائلات

هو برج القوس
اشيك الابراج
الله يكرمك..ميرسي كتيير
هههههه
يالا كفاية عليك كده.. رغيت كتير

سلاماتى
آه
وتاخد التاجين
والا
...
بلاش احسن

علوة said...

غمض عينيك

صباح الورد عليك يا ابو سمير ياللي بتنورني في كل كومينت

بس تنعزل ليه يا سيدي
أحلى فقرات بتحصل في الميكروباصات

صباح الفل
يا فندم

علوة said...

مش قادرة

يعني انا بنيت تاجي على شرفنطح الآخرين ؟
والله يا بنتي انا ماعدت عارف مين قالي يمين ومين قالي شمال
أنا طالع من معركة مريرة مع الجامعة وربنا عالم اللي في ضميري

من عينيّ حاضر لازم أرد على التاجين
من غير لا عياط ولا حاجة يا ستي

بالنسبة لموضوع جنب الشباك ده
القعدة جنب الشباك .. نزاهة
وبرضه القوس أشيك الأبراج رغما عن الحاقدين

صباح الفلين
عشان التاجين
!

علوة said...

هي حكاية فين يا جماعة مش باينة ؟
لا بترد هنا ولا بترد عنها
ايه ؟

قلب الأسد said...

علي باشا بوند .. سلامات واحشنا يا راجل و رمضان كريم يظهر إن مش أنا لوحدي اللي بحب قعدة الشباك دي !
بس حلوة شخصيتك غنية الحمد لله ! غنية بإيه بقى ؟ طبيعي إنك تحب السفر مانت قوس يا معلم ! ماقولتليش هي حبيبتك برج الأسد و لا إيه؟ .. كوارع و حلويات ! يع ! هو مين الممثل المشهور اللي مش بيعرف حتى يتكلم ؟ و مين المطرب
البرص ؟

علوة said...

منار باشا يا برج الأسد

وانتي أكتر والله يا منار كل سنة وانتي طيبة
آه الظاهر ان جنب الشباك ده اتجاه قومي !
شخصية غنية يعني عندها كتير مش فقيرة ومملة وثابتة على ملمح واحد الحمد لله

بكل فخر قوس
يع ؟ طب قومي قومي
الممثلين معروفين
المطربين برضه اللي مش بيعرفوا يتكلموا معروفين
لكن انا بكره البرص لوحد كبرص
مش قصدي ان في مطرب برص
مع ان في مطربين ابراص وصراصير وضفادع وكلاب وفيران وبلاستيك

صباح الفل

علوة said...

من حق يا منار
مش ناوية على بلوج ولا ايه ؟
عايزين نفتري عليكي بقى في الكومينتات
:))

صباح الفل

mariam said...

حمد الله على السلامه يا على

انا كمان بكره جدا الكلكسات الكتير
خصوصا فى ناس ايدها مش بتتشال من عليه بسبب و بدون سبب

القعده جنب الشباك تحفه بصراحه
بس حلوه عامل نفسى بفكر دى

Anonymous said...

عزيزي علوة
ميرسي على الإهداء الجميل ده
إن شاء الله هنزله عندي بس بعد ما تقرا آخر كلماتي في حب الحبيب
و على فكرة أنا ضحكت جامد من
(يخرج من يسار المسرح)
بجد تحفة يا علي
إجاباتك لذيذة جدا
و دمها خفيف زيك
دمت بخير أخي العزيز
منى

قلب الأسد said...

آه يا مفتري ! بقى عايز تفتري في الكومينتات ؟ .. أنا بموت في الإفترا عموما إدعيلي أخويا يبطل رخامة و يشيل الباسوورد عشان أعرف أقعد في بيتنا بدل بهدلة السايبرات دي و ساعتها يمكن أعرف أعمل بلوج

علوة said...

مريم

الله يسلمك يا مريم كل سنة وانتي طيبة


الله يفتح عليكي .. الكلاكسات دي رمز من رمزو الجحيم

جنب الشبك بيهوّن الطريق

بس حلوه عامل نفسى بفكر دى

دي أقل حاجة عندي طبعا زي م انتوا عارفين

علوة said...

عزيزتي وحدانية

العفو يا مني ديه أجل واجيب
اوك رايح أقراها اهو
وميرسي ع الكلام الكبير ده
انا قده طبعا ومغرور زي م كلنا عارفين
:))

صباح الفل

علوة said...

قلب الأسد

انا برضه اللي مفتري يا ست منار ؟
عموما يا رب اخوكي يشيل الباسوورد من نفسه كده

ايوه استني فعلا متعمليش مدونة من السيبر كده
ربنا يوفقك ويعجل بصدور مدونتك
صباح الفل

ياسر مدني ...دينامو الإخوان said...

أدعوك وأدعو كل الزوار إنهم يلحقوا فوازير رمضان وكل اللي فاتوا فزوره ممكن يلحق يحلها عشان كل فزوره ممكن تلحأها خلال عشر أيام وإن فزورهأول يوم رمضان حنأفل باب الحل بعد يومين

وبفكركم بردوا إن الجوايز جامده ..وإن الوازير عباره عن خلق وصحابي

علوة said...

انا مبحبش حاجة اسمها اخوان
ومش بحب الطريقة دي
التعامل مع البلوج كأنه سور ويلزقوا عليه إعلانات
وياريتني اعرفه كمان
انا هسيب الكومينت ده
المرة الجاية هلغيه

إحنا لسه داهنين
:)
صباح الفل

علوة said...

على فكرة انا مفهمتش هو عايز يا جماعة
فمحدش يسألني

هو وسخ السجادة ومشي

:))

محمد العدوي said...
This comment has been removed by the author.
محمد العدوي said...

بسأل بس انت طالع تتكلم فوق السطح ليه ..


بتكلم السحاب ..


كل الود . وطبعا مش هقول اجاباتك جميلة .. قالوها قبلي ..

كم ترك الأول للآخر .

علوة said...

بتتكلم عن الصورة ؟
امممممم
طب وانت عامل ايه دلوقتي ؟
بجد والله يا محمد .. أحسن ؟
عموما يا سيدي ده مش سطح
دي البلكونة
:)
بس انت كويس دلوقتي صح ؟

صباح الفل يا زعيم

Sara Swidan said...

كل دة كلام جميل جداً و سخرة ...
بس أنا بعلَّق عشان أقول الـــصـــــــورة حـــــــــــــلــــــــــــوة
جـــــــــــــــــــداً

!

علوة said...

سارة سويدان

ميرسي جدا يا سارة الله يعمر بيتك

بس سخرة دي غلطة كتابية لكلمة سكرة ولا كلمة مسخرة ؟ ولا ايه ؟

صباح الفل

Anonymous said...
This comment has been removed by a blog administrator.
علوة said...

انا برد ع الرجالة بس
اللي بتكلمني في وشي
اول م تحس انك راجل وتطلع بطاقة كده وتفرح وعايز تعرف انت مين في الدنيا بقى ابقى تعال وانا اعرفك انت مين

برضه صباح الفل

جوستيـن said...

اول حاجه ف الست حاجات اللي بتحبهم
علم مصر!!!!!!!!!!1
من حيث ايه ان شاء الله
هيه

Ahmed El_Desouky said...
This comment has been removed by the author.