بعرّف كويس
امتى اللحظة تكون عايزاني
وامتى تكون مش عايزة مني
غير جزء بسيط
بسيط في وجهة نظري
جميل جداً بالنسبة لها
وده بيرضيني جداً
والنهاردة
كل حاجة كانت بتوّطي
لما نعدي من قدامها
كل التفاصيل قررت
تلعب معانا في نفس الفريق
كل الملامح كانت بتباصي الابتسامة
ده في حد ذاته كان لذيذ
ومُنعش
مكانتش إيدي في إيدك
ولا كنتي نايمة على كتفي
حتى لما فتحنا القلوب بشويش
وحكينا
لا كنتي بتحاولي
ولا المحاولة .. حاولت أعملها
مش لازم تكوني بتفهمي في الكورة
عشان تعرفي ..
إن اللعب المُمتع
أجمل بكتير من هدف وحيد
أو كذا هدف بصراحة
من لعب كده وكده
على رأي المثل
الإجوان بتروح وتيجي !
المهم ننبسط
وده الجول يا صديقتي
مش كده ؟
اللي بيعيش على سطح المية
بيختار إنه يستمتع بقشرة تافهة اوي
من كيان البحر
مش وش نعمة يعني
واحنا اتقابلنا في كورس الغطس
تصبحي على خير يا صديقتي
