سيبوني ألاعب الوَحـش

كلمة الوحش ارتبطت في ذهني بأيام وساعات وأحلام ومواعيد كتيرة في الطفولة، مش هنسى الوحش بتاع كل حلقة في مازنجر، رغم إن كلامي لما يبدأ بمازينجر ده في حد ذاته –نظرياً- ينسف المقال بتاعي النهاردة

ليه بقى؟

لإني حابب (أرغي) شوية عن فكرة الوحش اللي معظم الشباب دلوقتي ارتبطت بيه -ويمكن لسة مُرتبطة- لإنه كان بالنسبة لنا مش بس علامة انتصار، ده كان حاجة زي رفع العلم على الضفة كده بالنسبة لشوية أطفال وصبية الدكر فيهم عنده 14 سنة!

كانت كل لعبة عبارة عن مستويات، مستوى أول، تافه, تعليمي، بيفهّمك يعني الدنيا ماشية إزاي في الحوار اللي انت فتحته على نفسك ده، يعني ماريو مثلاً – أيوه قاسم أمين ألعاب المرأة وفقاً للمقال اللي فات- كان بيبدأ أول مستوى بشوية طوب ومواسير خضرا وسلحفاة وبتاع بُني كده متفهملوش وش من ضهر، في ماسورة منهم ممكن تنزل فيها عشان تلاقي شوية دهب يكفوك انت وشلتك عشان كل واحد يروح يقرا فاتحة مع أبو البت اللي ماشي معاها !

لكن في ملحوظة للصيّع في لعبة ماريو، كان في حجر معمول هيدين كده زي فولدرات الأفلام البورنو على الجهاز في الثانوية العامة، الحجر ده بعد الماسورة الخضرا اللي فيها الدهب في أول مستوى، تقف في حتة معينة على طرف النجيلة وتخبط الحجر الذي لا يُرى بالعين المجردة، يطلع لك مشروم اخضر شكله مغسول كده ولما تاخده (المشروم يعني!) يديك روح زيادة، ولو انت بقى من المُسجلين خطر في اللعبة تقدر تاخد الروح وترجع الماسورة كل ده وانت دايس سرعة!

لو انت مش عارف لعبة ماريو أصلاً .. أكيد اتخنقت وبتقول إيه الرغي ده؟ ومن البديهي أقولك إطلع بنظرك فوق كده هتلاقيني قايل في تاني براجراف أرغي بين قوسين! بس لو اتفقنا على إن الناس لبعضيها .. يبقى إشتري مني

إيه العلاقة بقى بين الوحش؟ والروح؟ والماسورة الخضرا؟

سؤال مالوش أي لازمة لإني بصراحة مقتنع إنك تقرا وتوصل معايا واحدة واحدة، انت شاري المجلة دي عشان تقراها مش ترازيني !

لكن خليك معايا كده لحظة! أنا مهما كنت عارف دهاليس اللعبة، وعارف المستخبي فين والدهب فين .. لازم غصب عني ألاعب الوحش وأغلبه عشان أبقى قفّلت اللعبة، صح؟ حلو, طب مثلاً لو خدنا ماريو مثال، وفي أسوأ حالاته كمان، تخيّل كده ماريو وهو صغير داخل ع الوحش اللي بيتنطط على الجسر ده .. يعني ماريو لا كبير ولا معاه ضرب نار (أو ورد أو زهر أو شوك حسب منطقتك السكنية وتعريفها للسلاح العجيب ده)

هيبقى مطلوب منك عزيزي القارئ إنك يا تنط من فوق الوحش نطة مظبوطة أوي، أو تعدي من تحته بسرعة جداً وهو بينُط بتوقيت مظبوط أوي، وساعتها توصل لحاجة كده تقف عليها .. فالجسر يتفك والوحش يقع في الحمم البركانية

حتة تصوير بطيء كده، يعني أنا أعدّي من فوق أو من تحت هذا الوحش اللي عمّال يتف نار على خلقتي عشان ادوس على حاجة معمولة أصلاً عشان اللحظة دي، ده أكيد مش أوبشن من الوحش إنه يقف على جسر بيتفك، دي استهبال من صانع اللعبة بس هو برضة في أول اللعبة قال بين قوسين إن اللعبة دي في الهيافات يعني .. حاطط لك سلحفة ومواسير دهب ومشروم وأرواح ونجمة وضرب نار وانت ماشي تمام حتى لما ماريو كان بيضرب نار (في مستوى المية) .. متجيش عند الوحش .. وتعترض بقى ! صح ؟

ومن ناحية تانية، انت خلاص بدأت اللعبة وعايز تخلّصها، حتى لو ولاد خالتك مش قاعدين جنبك، انت بينك وبين نفسك .. عايز تكسر آخر اللعبة .. عايز تغلب الوحش

طبعاً كل لعبة كان ليها وحش، تنين، مُصارع، مدينة صعبة، أي حوار فاكس المهم إن يكون في حاجة تطلع عين اللاعب وتبقى في نظره .. وحش

طب إحنا جيل اتربى على إنه مش بس يبقى مستعد إنه يلاعب الوحش، لأ ده كمان ده إتأسس على إنه يسعى بكل قوته إنه يوصل للوحش .. ويغلبه

أفهم بقى .. ليه الناس مستغربة إن الشباب مبدأتش تهدا فعلاً .. غير لما بدأت تلاعب الوحش .. هو وأسرته ؟

كل لعبة وليها آخر، والشباب اللي في الشارع ده مش بتسيب الدراع أو الجوي ستيك ( حسب علامك برضة) إلا لما تفش غل كل المحاولات والأذى في أم الوحش ده لما تشوفه!

أعتقد إن في معادلة كده فاتت على كل القيادات السياسية اللي اتربت على لعب الكورة الشراب والسبع طوبات (اللي بحبها)، إن المعادلة بتاعتنا فيها وحش .. والمعادلة بتاعتهم فيها وقت !

وبقليل من الخبرة في علم الكيمياء الحديثة، هتكتشف بسهولة إن الوحش بياكل الوقت، يعني ممكن تلاعب الوحش كل يوم لغاية م هيجي له يوم تغلبه وكل م الوقت يعدّي .. كل م إصرارك على إنك تغلب الوحش .. هيزيد

دلوقتي في معادلة جديدة .. أول مرة نشوف وحش يوم م يجي له قلب .. يقف !

وحش في العناية المركزة، أو بيتعالج برة، أو وحش حواليه مجموعة حرامية بتشد منك الدراع وانت بتلعب !

أعتقد إن الشباب اللي اتعوّدت (تغلب) الوحش، بعد عشرين أو تلاتين سنة، هتقدر تفهم إن في وحش لازم يتغلب، وهتقف جنب ولادها وهما بيلاعبوا الوحش .. وهيبقى من الصعب جداً .. يكون في ناس -بعد كل العناء ده في اللعبة- بتقول : إحنا آسفين يا وحش!

ملحوظة : أي وحش يشوف في نفسه إنه وحش .. يبقى وحش

....

مجلة "إحنا" عدد شهر مايو

أيها الشعب .. دوس مُربّع

أنا فقر !

في هرمون جوايّا مانعني ألعب بلاي ستيشن 3 ، أنا كنت بحب الأتاري بتاع زمان، الطيارات أم دراعات سودا دي وزرار أحمر، "آكال البسكوت - عربيات (السبق)" اللي كل أطفال مصر كانت بتروح تاجر الجيم ب 10 صاغ من عند عم أبو عمرو -الله يرحمُه - اللي كان بالنسبة لي آله الأتاري عند الإغريق!

إلى أن ظهر قاسم أمين الأتاري "سوبر ماريو"، اللي ساب الفدان بتاعه وطلع جري وسط كائنات عيش الغراب وحاجة كده شبه لسان العصفور، عشان تحرير المرأة، وفي المرحلة دي توّلى عم أبو جورج مقاليد التحكم في مجريات أمور الأتاري، الدراع بقى صغير وفيه 4 زراير ودي بالنسبة لنا كانت مزاولة بس ماشي

كان في ألعاب كتير أيام م كانت الحياة بسيطة، بُعد واحد أو نص بُعد كمان، لكن مع ظهور الأبعاد الثلاثة.. ظهرت معشوقة حياتي "الكورة اليابانية" اللي بغض النظر عن إن اللاعيبة بتتحرّك زي التاكسي يمين في شمال .. إلا إن المزيكا بتاعتها كانت مُبهجة

وظهرت "الكورة المصرية" جرّبتها مرتين لقيتها بطيئة ومملة وعايزّة واحد معندوش طموح أو مالوش أهل وممكن يقعد لها يعني!، فرجعت ألعب بلياردو تاني وتنس طاولة، م أنا مزوّغ من المدرسة عشان ألعب مش أروح الجنينة ولا أخرج مع بنات!

بس بحب اللعب والأتاري، وخلاص مش لاقي حاجة غير أم البلاي ستيشن ده، بإعلاناته وملامح اللاعيبة اللي كل يوم بتبان حقيقية اكتر، ولقيت إن الموضوع إتغيّر وبقى ممكن تلعب بلاعيب واحد بس من الفريق، أو تبقى مدرب.. قلت لأ .. سأعود إلى الملاعب

لما لعبت بلاي ستيشن، موضوع ثلاثية الأبعاد ده في اللعب، لفت انتباهي إني وأنا بجري باللاعيب لازم أكون كاشف الملعب، وفاهم كويس إني لما أحب أباصي بيه أخلي جسمه معدول، وشوية التزامات كده لو معملتهاش اللاعيب مش هيعمل اللي أنا عايزه

بالإضافة .. إلى إن اللاعيب مش زي اليابانية هيفضل يرمح زي الفرس الأبجر كده من الجون للجون، لا .. د انسان وليه طاقة وبيفرهد وبتاع .. اللعب بقى بجد خالص!

بقيت أحاول أبص للأمور من بُعد واتنين .. وأحياناً لو دماغي رايقة من تلات أبعاد، لكن دايماً في حاجة ناقصة، في بُعد رابع مش موجود، لكن شباب 25 علّموني يعني إيه بُعد رابع

لما كنا في الميدان، كنا كلنا بندوس مربع، وكل اللي حوالينا بيصرّخوا "دوس إكس دوس إكس"، لكن احنا كنا على خط ال18 وفي زاوية مفتوحة، وإحنا عشان قبل م ندوس إكس أو مربع .. بصينا ع الخطة وشوفنا قدرات اللاعيبة إيه عرفنا إننا ممكن نشوط من بره ال18 .. طالما قانوناً الجون هيتحسب

دوسنا مربع .. مبارك وقع أو هكذا تظاهر

لما كنا بندوس مربع، كنا بنكمّل الطريق لغاية م جه الاستفتاء، في وجهة نظري الاستفتاء ده يعتبر شد من الفانلة بواسطة النظام في مباراته مع الشعب، الشعب اللي بعد م كان ماشي إشطة قرر إنه يرمي نفسه ع الارض يمكن الحكم (اللي هو عنصر الوقت) يدّي إنذار للنظام

يوم 25، ناس سألوني: تفتكر اللي احنا بنعمله دلوقتي هايجيب نتيجة؟ كنت بجاوب: "كفاية إن الشعب بقى بيشوط ع الجون .. هي مسألة وقت بس نشوط" .. وفعلا! شوطنا كتير وأنجزنا حاجات .. مع إن الشعب كله كان بيقول كفاية بقى .. دوس إكس .. طب دوس مثلث

الفكرة ببساطة، إن شباب 25 بصوا قدامهم لقوا مدفع وهم لوحدهم قدامه، قفشوا! وهي الثورة إيه غير قفش؟

الشباب صدّقوا بعض، وصدقوا وطنهم، والأهم من ده إن كل واحد صدّق نفسه، شباب 25 صدّقوا بكرة، إنه جايب نهار يستاهل المشوار! صدّقوا قوتهم الجبارة لما وقعت قدامها أنظمة جبّارة، أو ع الأقل اهتزت وعلى رأي جدتي الله يرحمها لما كانت تبص على المجلس الوغد للشعب : الحكومة اتشحكلت في لباسها!

أنا عارف كل شباب 25، عارف كل واحد اسمه إيه، بيحب إيه، مؤمن بإيه، عارف ماضي كل واحد منهم مع الشارع، إزاي كان قلبه بيقرصه لما يشوف أمين شرطة بياخد إتاوة، وإزاي كانت إيده بتترعش لما يسمع عن اغتصاب للبنات في وسط البلد، وضغط دمه اللي كان بينفر لما حد يقوله وانت مالك؟

وأقولكوا سر، كل شاب من شباب 25 كان عايز يمشي من مصر، ويخرج بعيد عن العادم ده، عادم الجهل والأنانية والاستغلال، لكن كل شاب من دول أعلن إنه مش بس هيدّي فرصة للبلد، لأ .. هيجيب البلد اللي اتسرقت

واقولكوا على عيب خطير فيّ؟ إنا قبل م أدخل الميدان كنت فاكر نفسي آخر الرجال المحترمين، وإن الآخرين مخهم جزمة ومش عايزين مصلحة البلد وإن أنا مصري جداً وبجد .. لوحدي

لكن التحرير أثبت إننا كتير أوي، حتى بوجود الكومبارسات والبارشوتات والزحاليق والبطاطا وكل ده، المصريين كتير أوي، اللي بيعشقوا مصر، اللي يرموا نفسهم في النار بجد عشان مصر، اللي مصر بالنسبة لهم أحب وأجمل الأشياء مش كلام، اللي صبروا ونالوا, اللي بينزلوا من التاكسي لما يشوفوا بنت بتتعاكس، اللي بيحبّوا كبار السن في السكة، اللي بيحافظوا على نظافة التواليت وراهم

أنا عن نفسي .. يوم الأربعاء 2 فبراير موقعة الجمل وبالليل المتحف، اتصابت إصابات كتير، في دماغي وضلوعي وكتفي اللي اتخلع، ولا كان عندي أزمة، وبصراحة أكتر بقى عشان مش هعرف أخبيها .. أنا زعلان جدا من كل اللي قالوا نعم .. ساعتها بس حسيت إني انضربت ومخدتش حقي، وده عمره م حصل!

اتنرفزت وسبيت ولعنت، والفيس بوك بتاعي يشهد إني كان ناقص أقول كلام قبيح رسمي، لكن لما هديت شوية .. اكتشفت إني مش لوحدي بقول لأ .. ده أنا على اقل تقدير .. أربعة مليون مصري جوه بعض

أحنا جامدين جداً يا شباب 25 .. فاضل بس نعرّف أسامي بعض عشان نعرف ننده على بعض في الملعب

حد يعرّف يتصرف لي في أتاري قديم ؟ بالدراعات الله يخليه :D

علي قنديل

..

مقالي في مجلة "إحنا" عدد شهر أبريل

أيوّه .. أيام م كنت بتخانق على الفيس بوك !

لمدة ست دقائق

تخيلّتُ نفسي مُبارك

أستعد لتسجيل صوتي في رسالة سيسمعها العالم كله، وستظهر صورتي التي ملئت عدداً ضخماً من حوائط حكومتي وجهازي الإعلامي بل ويوجد منها نسخة هائلة المساحة في معسكر الجيش حتى الآن

لن أشغل بالي بذلك الرجل الفقير المُبتهج الذي يقف في ميدان التحرير بجوار عربته الخشبية المرُصعّة بأعضاء الجاموس والبقر من مخ وأمعاء وكبد، فهو يظن في نفسه الذكاء عندما يبيع تلك العجائن البروتينية لهؤلاء المخربين والمتسببين في وقف الحال .. لذلك فالأمر برّمته لا يعنيه

وبالطبع لن أفكر في ذلك الشاب ذو العشرين ربيعاً الطائر من الفرحة وهو يقود دراجته البخارية الصينية بسرعة جنونية بعد ابتلاع عدد من حبات دواء ما لمرضى الصرع، يطير منتشياً في ميدان التحرير وسط الأطفال والشباب والنساء وكأن الميدان قد أصبح كوكباً خاوياً إلا من الأسفلت .. وصوت قبيح يحلق خلفه من سماعات صينية تردد كلمات غريبة تدعو لفقدان الوعي

أما هذا الشاب الذي خسر عينه في موقعة أرسلت فيها عدداً من الدواب، لن أفكر فيه فهناك جدول زمني لمواعيد جراحات يشغل كيانه، وحاجة مُلحّة للمال من أجل إتمام هذا الشفاء تنهش كفيه

أما أمهات هؤلاء الشباب الذين سقطوا صرعى أمام نيران رجالي المخلصين، فتباً لهن ولأبنائهن، لقد تسببوا في خنق تحركاتي وهم في نظري لا يساوون حفنتين من التراب .. لهذا لم أقدم لهم عزاءاً .. إنهم أغبياء

تخيلت نفسي مُبارك.. أستعد لإلقاء حديث صوتي

أقف أمام المرآة، أتأكد من سلامة ذلك الطلاء الأسود الذي أخفي به شبحاً غطى رأسي

أتناول وجبة دسمة جاءتني من أوروبا ساخنة

الآن سأوّجه حديثي لهؤلاء اللصوص الذين واتتهم الفرصة كي يقفوا في طريقي، ولكن مهلاً .. من هم ؟

لابد أن أُحدد خطورتهم كي أعلم أين سأوّجه ضربتي

ما هي خطورتهم؟ .. لم تعد لديهم أي خطورة لذلك سأُظهر ورقة من أوراقي التي لم تنفد، لقد استطاع هؤلاء اللصوص أن يهزّوا العالم كله ولم يتمكنوا من إفاقة ذويهم، بعد كل ما حدث في الميدان والشوارع وغضب ورحيل وجمعة وجمل .. رضوا بأن نقيم لهم مسرحية تافهة اسمها الاستفتاء ..

تباً لهؤلاء .. كنت أتوقع أن يتحرك المثقفون في الشوارع بسرعة البرق، يعملون على توعية الناس أن الاستفتاء لا علاقة له بالاستقرار !! ولكنهم لم يبرحوا أماكنهم أمام شاشات النت

لكني كنت أعلم تماماً أن الدنيا التي سافرت بلادها الواسعة هي بالنسبة لنصف من يعيشون في مصر عبارة عن جدارين هائلين من القمح يسمونهما "لقمة العيش"، كنت أعلم أنني سأنجح في المناورة

يريدون إسقاطي .. فلنجعل الإسقاط رحلة قصيرة لشرم الشيخ، فلنجعل التنحي عشرون قصة، أن سليمان خانني، أن الجيش خانني، أنهم جميعاً كانوا يخدعونني وأنني لا أعلم شيئاً عن هذا الظلم، فلهذه القصص ثمار حين أتحدث عن شرفي

تخيلت نفسي مُبارك ..

أتحدث مع من قالوا نعم للاستقرار ولم يفكروا لحظة في احتلال جهاز الإعلام لينشروا للمصريين كلهم أن هناك حياة جديدة على الأبواب.. وأننا أقسمنا على البعث

أتحدث مع هؤلاء الذين لم يطالبوا بشيء في التعليم سوى إلغاءه الفترة القادمة !!!!

أتحدث مع هؤلاء الذين يثقون في جنودي ثقة عمياء خوفاً منهم أيضاً

تخيلت نفسي أضع سبابتي على زر التسجيل كي أبدأ خطابي الذي كتبه أحد رجالي المخلصين لي ولمصلحته

تخيلت نفسي مبارك .. أضغط زر التسجيل وأتبوّل!

لا تنسى

عندما يقف المرء منا على خط نار

يلتقط بين لحظة ولحظة سقوط شخص بجانبه

بلا هوية أو اهتمامات مُشتركة جمعتكما يوماً

بل إنه قد يكون شديد الاختلاف عنك

شخص يفتقد تفاصيل المعرفة وإنما

علّق على صدره عُقد من علامات استفهام

يوزع منها حبّة بحبّة دون تمهيد

عند نهاية كل سؤال يدور بذهنك حين تراه

ترى هذا الشخص المجهول يسقط بجوارك

ويتكرر هذا

يسقط عن يمينك وشمالك وقد تراه يسقط أمامك

في تلك اللحظة حين تلتقطه عيناك

وهو يسقط برصاصة اقتحمت صدره

أو حجراً سقط من كوكب آخر على رأسه

لن تجد على صدره ذلك العقد الاستفهامي

وستراه شخصاً مألوفاً لعلك تراه كل صباح

وستسمع صوته حتى وإن صمت بدمائه

بداخلك .. سيدور صوت يرتدي مشاعرك

ستراه بملبسك الذي تتجمل به

وعندها ستدري أنه هذا الشخص هو انت

وهم على الجانب الآخر يحتفلون بقتلك انت

ولكن الحجر في يدك يصرخ مثل بوق القيامة

لقد قتلوك ..

عليك بالانتقام

انتقام فريد من نوعه يعطيك الشرف

أنها تلك المعركة المستقلة بتكويناتها

التي تفوز فيها انت .. حتى إن خسرت

حريتك

التي قد تصبح حياتك في سبيلها سيفاً

كما كان عند الشخص

ستنظر له مرة ثانية قبل أن تقذف حجرك

في تلك اللحظة التي أحدثك عنها .. لا تنسى

أن تصرخ صرخة تضاجع فيها الحرية

وأن تنتصر مثل هذا الشخص الراقد بجوارك

مش هلعب معاكوا تاني

"

جوايا اتنين

طفل ابن ناس .. فعلاً

بيستأذن وبيقول شكراً

لما بياكل مش بيوّقع

ولا في هدومه تملي يبقّع

طفل لطيف .. دمه خفيف

بيحّب اللعب والعجلة .. والصُحبة

وكلمة صباح الخير .. لعمو طـُلبة

ربوه على إنه فجأة

هيلاقي الدنيا سابقة

فايتاه مكانه لوحده

واللحظة الواحدة .. فارقة

دول حتى علّموه

المُسمار في الحيطة يدُّقه

ولما يكـُح يغطي بقه

وإنه أخوه مينفعش يزقـّه

علمّوه برُوحه يضحك

حتى لما نوره يقطع

وإنه لوحده يجيبله حقه

حقه بس ومش هيطمع

ربّوه

يلعب معاكوا في الطريق

يعرفكوا .. بحق وحقيق

شافكوا .. بالتصوير البطيء

مع إنه هو شريط بيسّف

والتاني

قصاد الطفل في راجل واقف

شارب حاجة .. وريقه ناشف

ناوي على حاجة فيها قفش

بايع

الدنيا عنده مجرد فرش

يبان محظوظ أو ابن ليل

وعنده لكل حاجة بديل

عايش في حتة مُعيّنة .. من الماضي

ولا يعرف حاجة عن حاضر .. مش فاضي

مخه جزمة .. لفعل الأمر مش راضي

نصه بيئة .. ونصه شيك

نص حنيّن .. ونص عاديك

أقولك حاجة اسمع بص

هو من كل حاجة نص

راجل ممكن يبقى برّي

معاه خازوق مغرّي

فاتح صدره .. كوتشينه

مفيش في قلبه ملف سرّي

الاتنين

الواد العسّول .. والراجل

مكس غريب .. مش قابل

قاعدين معاكوا بقالهم .. عُمري

ده غير طايقين لي أنا .. مـُري

لكن النهاردة الراجل

سّب لي بأهلي وأيّماني

والطفل عيّط وقالي

مش هلعب معاكوا تاني

"

علي قنديل

أيـهـا الحـافـي

أعترف أن أحد حوائط الإيمان بداخلي قد اهتز اليوم، وربما بالأمس

ذلك الإيمان بالوطن

الذي لم يُحرّكني فقط بل حرّك جموع شباب 25 يناير من قبلي ساعات وأيام وأسابيع

فكرة عبقرية هي فكرة الإيمان، تـُوّفر لك قدرة آلهية على المُضي قدماً في طريق ليس فقط غير مُمهد بل أن بشرته ما هي إلا شظايا الزجاج، ذلك الطريق هو مولد الإيمان الذي لن تشعر به إلا وأنت حافي القدمين، وستجد نفسك تعدو على الشظايا مثل عدّاء إفريقي تهتز كتلة الأرض تحت أقدامه

الإيمان .. أن تصل لمرحلة تعي بها تماماً أنك قد .. بل لا .. أنت بالفعل ستـُجرح، ستصُاب، ستـًصبح وحيداً، ستكون منبوذ، سيتكالبوا عليك أيها الأعزل .. ستموت

الإيمان .. هو أن تعي كل هذا يا حافي القدمين .. ولكن تؤمن بأنك لن تخسر

الإيمان هو انت، بلا رتوش أو شيء يسترك، فلن تجد ذلك السوبر مان الطائر كي يُـنقذك من ضميرك، لا شيء يعلو فوق صوت الضمير، انت تعلم ماذا فعلت وتفعل وستفعل وعلى ماذا قادر انت يا حافي القدمين

الإيمان .. ذلك الترياق الذي يقتل سُم الخوف، فبعقلك ؟ مما سيخاف العدّاء حافي القدمين الذي يركض مثل فهد على الزجاج؟

هل سيخاف من تلك الشظية لإنها مسنونة أكثر، أم تلك التي رغم صغر حجمها إلا أن لها أكثر من سن قاسٍ، أم تلك الشظية النحيفة المدببة؟ فقد تعلق في كعبه ويظل يطرق عليها بكل خطوة تقفز في السحاب وتعود للشظايا؟

لا أيها الحافي، انت الآن لا تـُفكر في كل تلك الماركات الرهيبة للشظايا .. انت الآن تؤمن .. لا وقت للتفكير عندما يتعرض إيمانك للاختبار من ضميرك .. إيمانك بأنك ستتمكن من الوصول لخط النهاية

الإيمان .. ذلك البحر الوردي الذي تسبحُ فيه مثل عارض أزياء جذاب، تعشق نفسك عندما ترى أمواجه تحيّك تحية تفوق احترام تحية العسكر، لا وجود لأسماك القرش في مياه الإيمان الوردية، قد تغطس فضولاً في معرفة أسراره، فترى زهرةً تعشقك، حكمةً تـُربيك، درساً يحنو عليه بعلِمه، شعيرات من البلوغ تنبت في صدر عقلك الذي يرى في إيمانه.. الرجولة

الإيمان .. كشف حساب يجعلك عندما تخطئ، تبحث عن وسيلة لفهم هذا الخطأ، انت لن تبحث عن مُبرر مثل الكافرين، انت انسان مؤمن يعلم تماماً أنه يُخطئ، قد لا ترى ذنباً رهيباً في الخطأ، ولكنك لن تكذب .. ستقول في قرارة نفسك النقية: يا ويلتي من ضميري .. لقد أخطئت، وصدّقني .. سيكون صوتاً رخيماً جهورياً حتى أن إيمانك سيقوله بصوت لونه الصدق .. على لسانك

أيها الحافي .. يا من تركض مرتدياً ورقة مكتوب عليها رقماً تحبه "خمسة وعشرين"، أيها الحافي المؤمن الذي ستُحدد المسافة التي قطعها بقعاً حمراء اللون من دماء قدميه المتراصة خلفه، والتي قد تـُصبح خطاً.. أكثر حمرة وغـُمقاً قبل خط الوصول

أيها الحافي الذي آمن فصدق .. وحدث فلم يكذب .. وأمّنته بلاده .. فلم يخـُن

أيها الحافي المؤمن .. بالله، بالوطن، بالفكرة، بالمبدأ، بنفسك، أيها المؤمن بأي شيء

بلادك الرائعة .. كما صرخّتَ لها، وفتحتَ الجنة بمفتاح الغضب، وتركت لك على عَلَمها نسراً يُذكّرك بما جاء لك به في الحلم وانت صغير، نسراً تبحث عنه بين طيّات القماش في رفرفة كانت حزينة، نسراً رغم علو شأنه، إلا أنه عندما فرح بك .. خرج من بين الألوان وحطّ على كتفيك كي يُقبلك

تنتظرك انت دون غيرك على خط النهاية، ستجد في بلادك زروعاً خضراء باردة بالندى عند الفجر تحتضن قدميك المدمومتين، ستجد شجرة جميز تظللك تحت أجنحتها حتى يجف عرقك، ستجد نيلاً يتمنى ان تشرب من كفيه البيضاويتين

أيها الحافي .. بلادك الرائعة .. تنتظرك انت دون غيرك

تحمّل الألم، لقد فقدت كثيراً من الدم، انت مُرهق .. مُجهد .. تكاد تفقد الوعي، لا تكل ولا تمل .. كل هذا يعني انك على بعد خطوات من النهاية

إيّاك الوقوف .. إيّاك الوقوف .. إياك الوقوف

لا تفقد دماً غالياً لإنك تستسلم .. دّعه ينبثق بكبرياء الأبطال من بين ألاف الجروح في كعبيك المتورمتين، اسمعني جيداً وانت تركض متثاقلاً .. هذا أفضل من السقوط مثل النعاج، اسمعني جيداً ولا تقف .. استمر .. انت رائع .. الجنة على بُعد عدة خطوات من هنا

سترى هذا الشريط الأبيض النحيف، خط النهاية .. نوراً روحانياً لم ترى مثله من قبل، ولكي أصدقك القول .. لن تستمتع بهذا كثيراً ..

سترى أناساً يحملونك على الأعناق، سترى في عيونهم فخراً وفرحة، سيحملونك ويُخبروا العالم بأسره .. أنك بطل، ثم سيضعونك على الأرض مُمدداً، سيتظاهرون بأنهم يُضمدون جراحك، ثم ترى منهم أناسا آخرين على الأعناق يهتفون باسمك، يتكالبون على الكأس الماسية .. جائزتك، يتظاهرون بأنهم فرحين بها، يتظاهرون بأنهم يقومون بتلميعها، لن تر لعابهم على شفتيهم .. ستراه في عيونهم

اهتم انت بتضميد جراحك أيها الحافي، تحمّل ألم استخراج قطع الزجاج التي ستسرق منك كـُراتك الدموية بلا رحمة، تحمّل وافتخر .. انت لم تفعل هذا لإنك بطل.. لقد انتصرت لإنك تؤمن

الآن فقط هو وقت المتظاهرون .. لا تقلق .. سينتهي العرض قريباً ويأتي دور المؤمنون، لا تقلق يا سيدي .. ستنال جائزتك

فعدسة الوطن كانت معك منذ خط البداية .. أي أنها سجّلت كل شظية

أعترف أن أحد حوائط الإيمان بداخلي قد اهتز اليوم، وربما بالأمس

عندما حلُمت بهؤلاء المتظاهرون يتظاهرون بتضميد أقدامهم .. ولكن مازال إيماني قصراً من اللؤلؤ

فأنا أؤمن بك .. أيها الحافي

.

إلى كل مصري كان في التحرير

آمن بالتحرير

كان يتمنى ان يكون في التحرير

إلى كل مصري بداخله .. يوجد التحرير

أنا أحبك

علي قنديل .. لا

كلمة لأ مش من الحنجرة

لكل اللي بيقولي البلد مش مستحملة

والفوضى والبلطجية موجودين

هو يعني الأول في عهد مبارك مكانش ده موجود ؟

طب هو انتوا عايزين الحرية ببلاش ؟

طب انتوا مش عايزين تثبتوا انكوا أقويا ؟

طب مش عارفين إن بواقي النظام هم اللي طالقين البلطجية ؟

طب لما انتوا عارفين ؟

خايفين ليه ؟

سؤال بسيط

هو احنا لما كنا إيد واحدة

مش قدرنا نوّقع حسني مبارك ؟

وناس كتير كانت تقولنا : يستحيل يستحيل

طب مش قدرنا نغلب البلطجية في الميدان وفي الشوارع ؟

مش حسينا قد إيه بنعشق مصر فعلاً ؟

وإنها أحلى من أي بلد في الدنيا

وإنها زي القمر طول م كلنا فيها ؟

هو احنا لما كنا إيد واحدة

مش هزّينا العالم كله برضة ولا أنا كنت بحلم ؟

انتوا ليه بتحبوا مصر

وانتوا باصين في الساعة ؟

اعتبرونا في آخر 10 دقايق قبل المدفع في رمضان

اعتبرونا في أسانسير عطلان بس واقفين في الأرضي مش هيقع

اعتبرونا في إشارة واقفة ساعة ونص

عشان في أمين شرطة ابن جزمة بيقلب الميكروباصات

اعتبرونا في أصعب لحظات الدنيا

م تستحملوا وتكمّلوا

عشان تفطروا

عشان تطلعوا

عشان تتحركوا

عشان توصلوا

صدّقوا إنكوا أقويا

صدّقوا إنكوا أقويا

مش كنا بدأنا نكره مصر ؟

وعايزين نسافر أو نهاجر ؟

مش كنا بنشتم البلد واللي فيها ؟

طب م أهو .. احنا نجحنا في أول خطوة

عرفنا السكة

ليه عايزين نرجع ؟

احنا اللي عملنا مبارك واللي تحته مش هم اللي عملوا فينا

احنا كنا نستاهل عشان بصينا في الارض

وشوفنا لقمة العيش كبيرة

شوفنا الجنيه ثروة

عايزين مبارك تاني؟

يبقى مكانش ليه لازمة بقى

وناخدها من قاصرها والشعب كله ينام على بطنه في الشوارع

قولوا لا .. الكلمة دي هي الحرية

البلد دي مش ببلاش

البلد دي أغلى من اي بلد

بس إدفع

كلمة لأ مش من الحنجرة

كلمة لأ بالدراع

يا رجالة

دول مجرد كلمتين من القلب

علي قنديل